nepal life 2076 3 18

ओलम्पिक फुटबल : जापान, स्पेन व मेक्सिको क्वाटरफाइनलय्, अर्जेन्टिना फ्रान्स आउट

नेवा: अनलाइन न्युज – ललेन्द्र शाक्य | २०७८ श्रावण १४, बिहिबार १२:०५:२५

जापानय् जुयाच्वंगु टोकिया ओलम्पिक २०२० अन्तर्गत मिजं फुटबलया समूह चरणया कासा क्वचाःगु दु । क्वाटरफाइनलय थ्यंकूगु च्यागुलिं पुचःया ल्यज्या जूबलय् छुं तःधंगु टोली समूह चरणपाखें पिहाँ वंगु दु । थ्व धलखय् रियो ओलम्पिक २०१६ य् रजत त्याकूगु जर्मनीलिसें फ्रान्स व अर्जेन्टिना नं लात ।

घरेलु टोली जापानलिसें स्पेन, मेक्सिको व इजिप्ट क्वाटरफाइनल थ्यंकूगु दु । थ्वसिबें न्ह्यः हे ब्राजिल, आइभरीकोष्ट, दक्षिण कोरिया व न्युजिल्याण्डं लिपांगु ८ य् थाय् कायेधुंकूगु दु ।

बुधवाः जूगु समूह ए या कासाय् फ्रान्सयात ४–० गोलअन्तरं बुकेधुंकाः जापान समूह विजेता जुयाः क्वाटरफाइनलय् थ्यंकूगु खः । जापानया नितिं ताकेफुसा कुबो, हिरोकी साकाई, कोजी मियोसी व डेइजन माएडां गोल याःगु खः । फ्रान्सया रान्डल कोलो माउनीं ७२ औं मिनेटय् रेडकार्ड नःगु खः ।

अथेहे, थुगु हे समूहया मेगु कासाय् दक्षिण अफ्रिकायात ३–० गोलअन्तरं बुकुसें मेक्सिको समूह उपविजेता जूगु दु । कासाय् निगुलि टिमया छम्ह छम्ह कासामिं रेडकार्ड नःगु खः ।

मेक्सिकोया नितिं एर्नेस्टो भेगा, लुइस रोमो व हेनरी मार्टिनं गोल याःगु खः । दक्षिण अफ्रिकाया रेपो मालेफवं ५८ औं व मेक्सिकोया कार्लोस रोड्रिगेजं ६६ औं मिनेटय् रेडकार्ड नःगु खः ।

समू ए दुने जापानं स्वंगुलिं कासा त्याकाः अपराजित जुल । निगू कासा त्याकूगु मेक्सिकाें ६ ल्याः मुंकल । फ्रान्स धाःसा ३ ल्याःलिसें स्वंगूगु थासय् च्वनाः पिहाँ वन । अथेहे, दक्षिण अफ्रिका ल्याः बिहिन जुयाः पिहाँ वन ।

अथेहे, समूह सी पाखें स्पेन समूह विजेता व इजिप्ट समूह उपविजेता जुयाः क्वाटरफाइनलय् दुहाँ वन । लिपांगु कासा स्पेन व अर्जेन्टिनां छगू छगू गोलया बराबरी कासा म्हिताः इजिप्टं अष्ट्रेलियायात २–० गोलअन्तरं बुकल । स्पेनया नितिं मिकेल मरिनों गोल यासें अग्रता ब्यूगु खःसां नं टोमस बेलमोन्टं अर्जेन्टिनाया नितिं बराबरी गोल याःगु खः ।

मेगु कासाय् इजिप्टया नितिं यासेर राएन व अमर हामदीं छगू छगू गोल यात ।

स्पेन स्वंगू कासापाखें ५ ल्याः मुंकाः समूह विजेता जुल । इजिप्ट व अर्जेन्टिनाया समान ४ ल्याः जूसां नं गोलअन्तरय् इजिप्ट न्ह्यःने लाःबलय् अर्जेन्टिना अभागी जुयाः पिहाँ वन ।

आः क्वाटरफाइनलय् जापानं न्युजिल्याण्डलिसे, स्पेनं आइभरीकोष्टलिसे, दक्षिण कोरियां मेक्सिकोलिसे व ब्राजिलं इजिप्टलिसे कासा म्हितीगु जूगु दु ।

Categorized in कासा