nepal life 2076 3 18

ओलम्पिकय् स्वर्ण त्याकूम्ह फिलिपिनी कासामियात साढे ६ लख डलर व छेँ सिरपाः

नेवा: अनलाइन न्युज – ललेन्द्र शाक्य | २०७८ श्रावण १२, मंगलबार १४:२१:५७

फिलिपिन्सया हिडिल्यन डियाजं टोकियो ओलम्पिकय् स्वर्ण पदक त्याकूसें सरकारपाखें थ्यंमथ्यं ६ लख ६० हजार डलर व छखा छेँ सिरपाः कायेखंगु खः । वं फिलिपिन्सया नितिं न्हापांगुखुसि ओलम्पिकय् स्वर्णपदक त्याकूगु खः ।

सोमवाः सनिलय् जूगु भारत्तोलन कासापाखेया ५५ केजी समूहया धेंधेंबल्लाय् डियाजं स्वर्ण पदक त्याकूगु खः । वं १२७ किलो ल्ह्वनाः भारत्तोलनय् थःगु व्यक्तिगत कीर्तिमान नं सुधार याःगु खः ।

फिलिपिन्सं सन् १९२४ स जूगु पेरिस ओलम्पिकय् न्हापांगुखुसि सहभागिता क्यंगु खः । तर, आःतक मुलुकया नितिं स्वर्ण पदक धाःसा सुनानं त्याके मफुनिगु खः । डियाजं टोकियो ओलम्पिक थःगु नितिं लिपांगु ओलम्पिक जुइगु घोषणा यायेधुंकूगु दु ।

स्वर्ण पदक त्याकेधुंकाः फिलिपिन्स सरकारं थःत ६ लख ६० हजार डलर बराबरया नगद, छुं व्यवसाय व न्हूगु छेँ सिरपाःया रुपं ब्यूगु जानकारी डियाजं कंगु दु । स्वर्ण पदक त्याकेधुंकाः डियाजं धाःगु दु, ‘जिं विश्वास हे याये फयाच्वंगु मदुनि, जिगु तःधंगु म्हगस पूवन ।’

डियाजं धाःगु दु, ‘जिं फिलिपिन्सया न्हूपुस्तायात छु धाये चाहेजू धाःसा छिकपिन्सं नं स्वर्ण पदकया म्हगस खंकेफु ।’ डियाज निदँ न्ह्यःनिसें मलेसियाय् च्वनाः वयाच्वंम्ह खः ।

Categorized in कासा