zero media family planning adv

ओलम्पिकय् ऐतिहासिक पदक त्याकूम्ह इरानी कासामिं देस त्वःतेगु घोषणा

नेवा: अनलाइन न्युज | २०७६ पौष २८, सोमबार १२:२६:०६

इरानया छम्ह जक मिसा ओलम्पिक पदक विजेता किमिया अलिजादेहं देस त्वःतेगु घोषणा याःगु दु । २१ दँया किमियां सामाजिक संजालय् च्वयाः थःगु निर्णय सार्वजनिक याःगु खः । व सन् २०१६ स रियो ओलम्पिकय् ताइक्वान्दो कासाय् कास्य पदक त्याकाः इरानया नितिं इतिहास दयेकूगु खः ।

इरानय् प्रताडित लखौं मिसापिंमध्ये थः नं छम्ह जूगु धासें वं च्वःगु दु, “जि पाखण्ड झूठ, अन्याय व चाप्लुसीया हिस्सा जुइ मयः ।”

किमिया आः गन दु धैगु विषयस आधिकारिक जानकारी मदु । तर इरानी मिडियातसें व तालिमया झ्वलय् नेदरल्याण्डय् जुइफूगु न्ह्यथंगु दु ।

इरानी सैनिकं १७६ म्ह च्वनावंगु युक्रेनया विमानयात रकेट प्रहार यानाः कुतुकूगु विरोधय् सरकारविरुद्ध प्रदर्शन जुयाच्वंगु इलय् ओलम्पिक कासामिया थ्व धापू पिहाँ वःगु खः । इरानया आक्रमणपाखें युक्रेनया विमान दुर्घटना जुयाः चालक दलया ९ म्ह दुजःलिसें १७६ म्ह मनूत सीगु खः ।

सुरुइ इरानं विमानय् आक्रमण मयानागु धाःगु खः । तर लिपा सेना प्रमुखं अमेरिकां प्रहार याःगु ड्रोन तायेकाः भुलबस युक्रेनी विमानय् आक्रमण जूगु यानागु धासें गल्ती स्वीकार याःगु खः । वधुंकाः सरकारी अधिकारीपिन्सं मखूगु खँ ल्हाःगु धासें इरानी जनता आन्दोलनय् क्वाहाँ वःगु खः ।

Categorized in अन्तर्राष्ट्रिय