1142 nhoo dan adv

ऐतिहासिक व सांस्कृतिक महत्वया कात्ति प्याखं बुधवाःनिसें क्यनीगु

नेवा: अनलाइन न्युज – Bijay Ratna | २०७८ कार्तिक २२, सोमबार १२:२०:४३

ने.सं. ११४२ कछलाथ्व चौथि सोमवाः/जुजु सिद्धिनरसिंह मल्लया पालंनिसें न्ह्यानाः वयाच्वंगु यलया सांस्कृतिक महत्वं जाःगु ऐतिहासिक कात्ति प्याखं यलय्  बुधबाःनिसें न्ह्याइगु जुउगु दु ।

कात्ति प्याखं नेपाल सम्वत ७६१ निसें मदिक्क क्यनाः वयाच्वंगु दु । थुकथं ३८० दँ पुलांगु थ्व ऐतिहासिक कात्ति प्याखं थुगुसिइ कातिं प्याखँं च्यान्हुतक क्यनेत्यंगु दु।

नेपाल सम्बत ११४२ कछलाथ्व षष्ठि,  कार्तिक २४ बुधबाःनिसें कछलाथ्व त्रयोदशी (मंसिर १ गते) बुधबाःतक बहनि न्हयताः ई लिपा मंगःया कात्ति दबुलिइ क्यनेत तयारी जूगु खँ कात्ति प्याखं संरक्षण समितिया संजय शर्मा राजोपाध्यायं धयादिल ।

जुजु सिद्धिनरसिंह मल्लया पालंनिसें न्ह्यानाः वयाच्वंगु प्याखंनय् सुदामा प्याखँ, भक्त सुरदास प्याखँ, बाथ प्याखँ, युद्ध कला, देवी नृत्य, जलशयण, वराह अवतार, नृसिंह अवतार, वस्त्रहरण, दधिलीला थज्याःगु प्याखं क्यनिगु खँ कात्ति प्याखं संरक्षण समितिया नायः किरण चित्रकारं जानकारी बियादिल  ।

छगू इलय् नीन्हयन्हुतक नं क्यंगु कात्ति प्याखं थगुने कोरोनाया कारणं दर्शक मतसें निन्हु जक क्यंगु खः।

थुगु प्याखं जुजु सिद्धिनरसिंह मल्लया पालय् च्यान्हु क्यंगु खःसा लिपा श्रीनिवास मल्लया पालय् झिंन्यान्हु क्यंगु खः । कात्ति प्याखनय् राजोपाध्याय, श्रेष्ठ, प्रधान, अमात्य, जोशी, चित्रकार, मल्ल लिसें नेवाः दुनेया थीथी जातया प्रतिनिधित्व जुइगु यानातःगुलिं थ्व छगू नेवाः एकताया प्रतिक कथं कायेमा धकाः धायेगु थाय् दु ।

Categorized in कला