नेवा: अनलाइन न्युज | २०८० आश्विन १, सोमबार १२:३६:१८

मिसा फुटबल पुचःया प्रशिक्षक बालगोपाल महर्जन, बक्सिङया प्रशिक्षक दिपक महर्जन

१९ क्वःगु एसियन गेम्सय् सहभागी जुइत नेपाली राष्ट्रिय मिसा फुटबल पुचः चीन वंगु दु ।

चीनया आन्झाउस थ्वहे सेप्टेम्बर २३ निसें अक्टोबर ८ तक जुइगु १९ क्वःगु एसियन गेम्सपाखें नेपाली मिसा फुटबल पुचलं एसियन गेम्सय् डेब्यु यायेत्यंगु खः ।

रेणुका नगरकोटीया कप्तानीइ दूगु नेपाली पुचलय् २२ म्ह खेलाडी दु । नेपाःया सफल प्रशिक्षक बालगोपाल महर्जन मू प्रशिक्षक खः ।

१९ क्वःगु एसियाडय् मिसा फुटबल कासा धाःसा २१ सेप्टेम्बरनिसें सुरु जुइ । नेपाः दुथ्याःगु समूह ‘डी’इ विश्वकप म्हितेधुंकूगु जापान व भियतनामलिसें साफ च्याम्पियनसिपया विजेता बंगलादेश दुथ्याः । जापान विश्वकप विजेता तकं खः ।

नेपालं थःगु न्हापांगु कासा भियतनामलिसे २२ सेप्टेम्बरय् म्हिती । अथेहे, विश्व विजेता जापानलिसे २५ सेप्टेम्बर व बंगलादेशलिसे २८ सेप्टेम्बरय् म्हिती ।

नेपालं छुं ई न्ह्यः बंगलादेशविरुद्ध निगू कासाया मैत्रीपूर्ण सिरिज त्याकेधुंकूगु दु । अथेहे, पेरिस ओलम्पिक अन्तर्गत मिसा फुटबलया एसियन छनोटय् नेपालं भियतनामलिसे घरेलु मैदानय् निगू कासा म्हितूगु खःसा निगुलिं कासाय् पराजित जूगु खः ।

थ्वहे दथुइ २०१० या गोन्जाउ एसियाडय् नेपाःया नितिं छगू जक कास्य त्याकूगु बक्सिङय् पूर्व कासामि दिपक महर्जन नं थौं सोमवाः हे चीन वंगु दु ।

महर्जन एसियाड न्ह्यः टर्च ¥यालीइ सहभागी जुइत याकनं हे वंगु खः । दिपक महर्जन १९ क्वःगु एसियाडय् नेपाली बक्सिङ पुचःया प्रशिक्षक नं खः ।

Categorized in कासा