nepal investment baink

एसईईया रिजल्ट : असार निगूगु वाः दुने

नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

राष्ट्रिय परीक्षा बोर्ड, परीक्षा नियन्त्रण ज्याकुथिं थुगु दँया माध्यमिक शिक्षा परीक्षा (एसईई) या लिच्वः असारया निगूगु वाः दुने सार्वजनिक यायेगु कथं ज्या जुयाच्वंगु जानकारी ब्यूगु दु ।

परीक्षा नियन्त्रक नन्दलाल पौडेलं ज्याकुथिं तयार याःगु कार्य योजना कथं उत्तरपुस्तिका परीक्षण व अंकभार प्रविष्ट याकेगु ज्या क्वचायेधुंकूगु जानकारी ब्यूगु दु । वं कार्य योजना कथं ज्या जुयाच्वंगुलिं असारया निगूगु वाः दुने लिच्वः सार्वजनिक यायेगु कथं मेमेगु ज्या तीव्र गतिइ जुयाच्वंगु धाःगु दु ।

पौडेलं धाःगु दु, “जिमिसं उत्तरपुस्तिका परीक्षण व अंक अभिलेखया ज्या क्वचायेकूगु दु । प्राविधिक त्रुटी खनेमदुसा छुं दिं न्ह्यः हे लिच्वः सार्वजनिक यायेत व छुं समस्या जूसा निगूगु वाःसिबें च्वये मवनीगु कथं ज्या जुयाच्वंगु दु । कर्मचारीया थीथी पुचः दयेकाः ज्या जुयाच्वंगुलिं निर्धारित इलय् हे लिच्वः सार्वजनिक यायेगु जुइ ।”

पौडेलं ५२ गू परीक्षण केन्द्रय् उत्तरपुस्तिका परीक्षण याःगु जानकारी तकं ब्यूगु दु । वंगु दँ असार २४ गते एसईईया लिच्वः सार्वजनिक याःगु बोर्डं थुगु दँ १४ दिं न्ह्यः हे लिच्वः सार्वजनिक यायेगु कथं तयारी याःगु धासें परीक्षा नियन्त्रक पौडेलं थुगु दँ सैद्धान्तिक व प्रयोगात्मकयात फरक यानाः सार्वजनिक यायेगु धाःगु दु ।

थुगु दँया लिच्वलय् विद्यार्थीं सैद्धान्तिक पाखे ७५ अंकया परीक्षाय् ३५ प्रतिशत अर्थात् २७ अंक अनिवार्य हये हे माःगु अन्यथा फेल जू सरह कथं काइगु धाःगु दु ।

वंगु चैत्र १५ गतेनिसें न्ह्याःगु थुगु दँया परीक्षाय् नियमितपाखे ४ लख ६७ हजार व ग्रेड वृद्धिपाखे २१ हजार विद्यार्थीं परीक्षा ब्यूगु दु ।

Categorized in राष्ट्रिय