zero media family planning adv

एम्स आर्टिष्ट फुटसल भीम तुलाधर व पल्पसा डंगोलया टिम न्हाप

नेवा: अनलाइन न्युज – ललेन्द्र शाक्य | २०७७ चैत्र २, सोमबार १०:२६:५३

वइगु चैत्र १४ गते शनिवाः चोभारय् सिरपाः लःल्हाइगु लिसें सांस्कृतिक पिकनिक ज्याझ्वः

नेपाःया कलाकारपिनिगु दथुइ स्वापू स्थापित यायेगु लिसें थःथवय् म्हसीका कालबिल यायेगु आज्जुं एम्स इन्टरटेन्टमेन्ट प्रा.लि.या ग्वसालय् वंगु फागुन २९ गते एम्स आर्टिष्ट फुटसल कासा क्वचाःगु दु ।

मत्स्य रिक्रियशन सेन्टर मच्छेगामय् जूगु उगु फुटसल कासाय् मिजं कलाकारपिनिगु पाखें बरिष्ठ संगीतकःमि भीम तुलाधरया टिम न्हाप लाःगु खःसा मिसा कलाकारपिनिगु पाखें बरिष्ठ कलाकार पल्पसा डंगोल चम्सुरीया टिम न्हाप लाःगु खः ।

अथेहे, मिजं कलाकारपाखें बरिष्ठ कलाकार कृष्णभक्त महर्जनया टिम ल्यू व बरिष्ठ संचारकःमि भाईकाजी महर्जन नयनया टिम लियांल्यू लाःगु खः ।

थ्वहे झ्वलय् मिसा कलाकारपाखें बरिष्ठ म्येहालामि सरस्वती मानन्धरया टिम ल्यू व बरिष्ठ कलाकार हिसिला महर्जनया टिम लियांल्यू लाःगु खः ।

चन्द्रागिरी नगरपालिकाया प्रमुख घनश्याम गिरी मूपाहाँ कथं उगु एम्स आर्टिष्ट फुटसल कासाय् झायादीगु खःसा वय्कलं हे फुटसल कासाया उलेज्या यानादीगु खः ।

अथेहे, फेरि भेटौंला संकिपाया नायक प्रकाश अधिकारी विशेष पाहाँ कथं उगु कासाय् उपस्थित जुयादीगु खः ।

एम्स आर्टिष्ट फुटसल कासाया ग्वसाः खलः एम्स इन्टरटेन्टमेन्ट प्रा.लि.या नायः सुरेन्द्र महर्जन तापाख्यःमिं बियादीगु जानकारी कथं आः कासाय् सिरपाः त्याकेत ताःलाःगु पुचःयात सिरपाः लःल्हायेगु नितिं वइगु चैत्र १४ गते छगू सांस्कृतिक पिकनिक ज्याझ्वः ग्वसाः ग्वयागु जानकारी बियादीगु दु ।

थ्वहे वइगु चैत्र १४ गते शनिवाः किपूया चोभार (जलबिनायक मञ्जुश्री पार्क)य् सांस्कृतिक पिकनिक ज्याझ्वःया ग्वसाः ग्वःगु दुसा उगु सांस्कृतिक पिकनिक ज्याझ्वलय् फुटसल कासाय् सिरपाः त्याकेत ताःलाःगु टिम लिसें सहभागी टिमयात सिरपाः लःल्हायेगु ज्याझ्वः जुइ धकाः एम्सया नायः सुरेन्द्र महर्जन तापाख्यःमिं जानकारी बियादीगु दु ।

भाजु तापाख्यःमिं उगु सांस्कृतिक पिकनिक ज्याझ्वलय् नुगः क्वसाःपिं सकलसित उपस्थितिया नितिं इनाप यानादीगु दु ।

Categorized in कासा