city axpris 2

एमाले महासचिव शंकर पोखरेल च्वनावंगु गाडी दुर्घटना

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व तृतीया

नेकपा एमालेया महासचिव शंकर पोखरेल च्वनावंगु जिप दैलेखय् दुर्घटना जूगु दु ।

महासचिव पोखरेल च्वनावंगु म१च ३६९ ल्याःया स्कोरपियो जिप शनिवाः न्हिनय् थ्यंमथ्यं ३ ता इलय् दैलेखया डुंगेश्वर गाउँपालिकाया चुप्रा बजार लिक्क दुर्घटना जूगु खः ।

नेकपा एमालेया उपमहासचिव विष्णु रिमालं आइतवाः सामाजिक संजालय् जिप दुर्घटना जूगु किपाः सार्वजनिक यासें ‘छगू अकल्पनीय क्षति जुइगुपाखें बचेजूगु भयानक दुर्घटना’ च्वःगु खः । किपाः स्वय्बलय् लँपु सिथय् जिप फातापुलाच्वंगु खनेदु ।

जिप दुर्घटनाय् लाःसां नं महासचिव पोखरेल सकुशल जूगु जिल्ला प्रहरी ज्याकुथि दैलेखया डिएसपी किशोर लम्सालं जानकारी ब्यूगु दु ।

डिएसपी लम्सालं धाःगु दु, ‘महासचिवयात छुं जूगु मदु। वय्कः च्वनावंगु गाडी लँपुइ फातापुलेधुंकाः मेगु गाडीइ च्वनाः ज्याझ्वलय् सहभागी जूगु खः ।’

वहे जिपय् च्वनावंम्ह छम्ह सामान्य घाःपाः जूगु वया ल्हातय् घाःपाः जूगु डिएपींजानकारी ब्यूगु दु ।

एमाले महासचिव पोखरेल जिल्ला अधिवेशनय् सहभागी जुइत सुर्खेतपाखें गाडीइ च्वनाः दैलेख वनाच्वंगु इलय् दुर्घटनाय् लाःगु खः । जिप चालकं ब्रेक फेल जुयाः गाडी फातापूगु धाःगु डिएसपी लम्सालं जानकारी ब्यूगु दु ।

Categorized in दुर्घटना-अपराध