zero media family planning adv

एमाले दुहाँ वंपिं प्यम्ह माओवादी मन्त्रीपिनिगु सांसद पद खारेज

नेवा: अनलाइन न्युज – ललेन्द्र शाक्य | २०७७ चैत्र २६, बिहिबार १६:५०:५०

नेकपा माओवादी केन्द्र परित्याग यानाः नेकपा एमाले दुहाँ वंपिं प्यम्ह मन्त्री प्रतिनिधिसभा दुजः पदं पदमुक्त जूगु दु ।

प्रतिनिसिभाया बिहिवाः च्वंगु बैठकय् सभामुख अग्नीप्रसाद सापकोटां अर्घाखाँचीया टोपबहादुर रायमाझी, कैलाली ४ या लेखराज भट्ट, रौतहट ३ या प्रभु शाह व कैलाली ३ या गौरीशंकर चौधरीया सांसद पद खाली जूगु जानकारी ब्यूगु खः ।

माओवादी केन्द्रया संसदीय दलया नेता पुष्पकमल दाहाल प्रचण्डं सोमवाः संसद सचिवालययात पौ छ्वयाः पार्टी परित्याग याःपिं प्यम्ह सांसदपिन्त कारवाही यानागु जानकारी ब्यूगु खः । राजनीतिक दलसम्बन्धी ऐन कथं दल परित्याग याःपिं सांसद पदमुक्त जुइगु खः ।

सांसद पदपाखें पदमुक्त जूपिं प्यम्ह सांसद मन्त्री खः ।

संविधानविद् टीकाराम भट्टराईया कथं प्रतिनिधिसभा दुजः मजुइखतं मन्त्री पद नं खाली जुइ । भट्टराई नं धाःगु दु, इमित पदय् कायम हे यानाः तयेगु खःसा हाकनं नियुक्ति यायेमाः ।

प्रतिनिधिसभाय् नेकपा माओवादी केन्द्रया प्यंगू सिट म्हो जुयाः आः प्रत्यक्षपाखे निर्वाचित प्यम्ह सांसद पदं मुक्त जुइधुंकाः सिट ल्याः क्वाहाँ वयाः ४९ य् सीमित जूगु दु । थ्वसिबें न्ह्यः माओवादी केन्द्रया ५३ म्ह सांसद ल्याः दूगु खः ।

Categorized in राजनीति