एमालेया औपचारिक ज्याझ्वः स्वन्हुतक स्थगित, पार्टी ज्याकूया ध्वाँय् बच्छि क्वःसुकीगु
नेवा: अनलाइन न्युज – ललेन्द्र शाक्य | २०८० भाद्र २६, मंगलबार १३:१६:२८
नेकपा एमालें पार्टी न्वकू सुवासचन्द्र नेम्वाङ मदुगुलिं देय् न्यंकंया पार्टी ज्याकूया ध्वाँय् बच्छि क्वःसुकेगु निर्णय याःगु दु ।
थौं मंगलवाः च्वंगु पार्टीया सचिवालय बैठकं विशेष शोक प्रस्ताव पारित यासें देय् न्यंकंया पार्टी ज्याकूया ध्वाँय् बच्छि क्वःसुकेगु व पार्टीया केन्द्रीय ज्याकू, प्रदेश ज्याकू, जिल्ला ज्याकू व नेम्वाङया निर्वाचन क्षेत्रय् शोक पुस्तिका तयेगु निर्णय याःगु पार्टी उपमहासचिव प्रदीप ज्ञवालीं धाःगु दु ।
ज्ञवालीं धाःगु दु, ‘जिमिसं शिेष शोक प्रस्ताव पारित यानागु दु । वय्कःया सम्मानय् स्वन्हुतक देसया फुक्क पार्टी ज्याकुथिइ पार्टी ध्वाँय् बच्छि क्वःसुकेगु जूगु दु । पार्टीया केन्द्रीय ज्याकुथि, प्रदेश ज्याकुथि, जिल्ला ज्याकुथि व वय्कःया निर्वाचन क्षेत्रय् शोक पुस्तिका तयेगु जुइ ।’
लिसें, पार्टी व पार्टी सम्बद्ध जनसंगठनया औपचारिक ज्याझ्वःत स्वन्हुतक स्थगित जूगु दु । एमालेया थौं मंगलवाः च्वंगु सचिवालयया बैठकं वइगु असोज २ गते नेम्वाङया सम्मानय् पार्टी केन्द्रीय ज्याकुथिया ग्वसालय् विशेष श्रद्धाञ्जलि सभा यायेगु निर्णय याःगु दु ।
नेम्वाङया सीम्ह अन्तिम श्रद्धाञ्जलिया नितिं कन्हय् बुधवाः न्हिनय्तक पार्टी ज्याकुथिइ तयेगु नं उपमहासचिव ज्ञवालीं जानकारी ब्यूगु दु ।
एमालें नेम्वाङ च्वनीगु मेचय् स्वाँमाः तयाः थौं मंगलवाःया सचिवालय बैठक न्ह्याकूगु खः ।
