nepal life 2076 3 18

एमसीसी विशुद्ध नेपाःया हितय् दु, एमसीसीइ करेक्सन यायेत अमेरिका तयार दु धाःगु दु : प्रधानमन्त्री देउवा

नेवा: अनलाइन न्युज – ललेन्द्र शाक्य | २०७८ कार्तिक ३, बुधबार १४:५५:३३

प्रधानमन्त्री शेरबहादुर देउवां थःगु नेतृत्वया वर्तमान सरकारं जनतायात छुं राहतया ज्याझ्वः न्ह्यःने यंकागु स्पष्ट याःगु दु । प्रधानमन्त्री जूगु सच्छि दिं पूवंगु लसताय् प्रधानमन्त्री देउवां थथे धाःगु खः ।

सच्छि दिनय् सरकारं जनतायात मेगु छु छु बिल ? सच्छि दिंया उपलब्धीत छु छु खः ? धैगु विषयस देउवां धाःगु दु, ‘थ्व सरकारं अतिकं तःधंगु राहतया घोषणा याःगु दु धकाः ला जिं धायेमखु । तर नं छुं राहतया ज्याझ्वः न्ह्यःने यंकागु दु । सरकारं क्यान्सर, किड्नी व स्पाइनल इन्जुरीया ल्वगिपिन्त मासिक न्याद्वः तका दां भत्ता बिइगु निर्णय याःगु दु । महामारीया हुनिं ल्हाःतुति छ्यलेत व न्हिथं ज्या यानाः जीवन गुजारा यायेत हे थाकुपिं अति विपन्न गरिब छेँजःपिन्त प्रति छेँजः झिद्वः तकाया दरं राहत बिइगु घोषणा नं याःगु दु । अंगभंग जूपिन्त क्षतिपूर्ति व छेँजःया छम्हेसित रोजगारीया व्यवस्था यायेगु प्रक्रिया नं न्ह्यःने यंकागु दु । थ्व दथुइ झीसं खुसिबाः चलः व डुवानया समस्या भोगेयानाच्वनागु दु । खुसिबाः चलखं पीडितपिन्त खाद्यान्न लिसेंया ग्वाहालि नं यानाच्वनागु दु । आः सुदूरपश्चिमया छुं जिल्लाय् तच्वकं वा वयाः तःधंगु क्षति याःगु दु । महाकालीइ वःगु खुसिबालं तःधंगु क्षति याःगु अवस्था दु । जनताया सुरक्षा व राहतय् सरकार प्रतिबद्ध दु ।’

अथेहे, प्रधानमन्त्री देउवां एमसीसी नेपाःया हितय् दूगु दाबी याःगु दु । वं धाःगु दु, ‘एमसीसीया विषयस गुगु प्रचार याःगु दु, व खँ हे मखु । एमसीसी नेपाःयात ब्यूगु थ्व ग्रान्ट खः । ब्याजय् मखु थ्व । ऋण मखु, अनुदान खः । छुं तत्व दु नेपालय्, उगु तत्वं एमसीसीया नामय् बखेडा यायेत्यंगु दु । उकिं एमसीसी विशुद्ध नेपाःया हितय् दु । अय्सां नं एमसीसीइ करेक्सन यायेत अमेरिका तयार दु धाःगु दु । अमेरिकां नेपाःया कानूनसिबें च्वय् च्वंगु मखु धकाः धायेधुंकूगु दु । वास्तवय् विश्व बैंकया हे खँ ल्हायेगु खःसा वलिसे ल्वापु जुल धाःस अन्तर्राष्ट्रिय कानून आकर्षित जुइ । एडीबी, आईएमएफय् नं वहे खः । इमिगु गुलि नं ऋण दु उगु विषयस मुद्दा लाःसा अन्तर्राष्ट्रिय कानून कथं वनी । नेपाःया कानूनं स्वये हे खनीमखु । व सन्दर्भयात नेपाःया कानूनसिबें च्वय् धकाः बखेडा पिकाःगु दु ।’

Categorized in राजनीति