swastha 3

एमसीसी पक्षधरयात विप्लवं बिल ज्यानया धम्की, देसय् ल्वापु जुइगु खतरा !

नेवा: अनलाइन न्युज – ललेन्द्र शाक्य | २०७८ भाद्र २९, मंगलबार १२:२६:३४

अमेरिकी सहयोग सम्बन्धी मिलेनियम च्यालेञ्ज कर्पोरेशन (एमसीसी) विरुद्ध नेत्रविक्रम चन्द विप्लव कडा रुपं न्ह्यःने वःगु दु । विप्लवं एमसीसी पारित यायेत्यंपिन्त जीवनया ख्याल यायेत ख्याच्वः तकं ब्यूगु दु ।

म्हिगः तिंख्यलय् एमसीसी पास मयायेत थःपिन्सं विगतय् नं ख्याच्वः बियाः वयाच्वनागु व थुकियात न्ह्यःने यंकेत्यंपिन्त भौतिक कारवाहीया ख्याच्वः तकं बिल । विप्लवं एमसीसीयात राष्ट्रघाती धासें छुं नं हालतय् पास याकेमबिइगु धाःगु दु ।

निर्वाचन आयोगय् दर्ता मजूगु नेपाल कम्युनिष्ट पार्टीया महासविच विप्लव अमेरिका विरोधी पहिचान दयेकाः वयाच्वंगु दु । थुकिं यानाः नं विप्लवं एमसीसीया विरोध याःगुयात स्वाभाविक कथं काःगु दु ।

नेपाल मामलाय् चीन व अमेरिकादथुइ टकराव अप्वया वंबलय् कम्युनिष्ट पार्टीत एमसीसीया विरोधय् खुलस्त जुजुं वःगु दु । गैरकम्युनिष्ट पार्टीत एमसीसीया पक्षय् खुलस्त जूगु दु । कम्युनिष्ट पार्टीत चीनलिसे लिक्क लाःगु व गैरकम्युनिष्ट पार्टीत पश्चिमा देसतलिसे लिक्क लाःगु खुलस्त जूबलय् एमसीसीया पक्ष वा विपक्षय् ध्रुवीकरण नं थथे हे जुजुं वःगु दु ।

एमसीसीया विषयस नेपालय् अमेरिका व चीनदथुइ टकराव अप्वः बलय् देस दुनेया शक्तिदथुइ नं न्हूगु द्वन्द्वया खतरा अप्वःगु दु ।

Categorized in राजनीति