नेवा: अनलाइन न्युज – ललेन्द्र शाक्य | २०८० आश्विन १, सोमबार १२:४४:५०

एबीसी टेलिभिजनय् ‘झीगु सः ( सिजन टू ’ शुरु जूगु लसताय् आइतवाः छगू ज्याझ्वः जूगु दु ।  

झीगु सः सिजन टू या निर्माता निर्देशक विजयरत्न असंबरेया सभानायःसुइ न्ह्याःगु उगु ज्याझ्वलय् कार्यकारी निर्माता राजु राजदेव बज्राचार्यं लसकुस यानादीगु खः ।

ज्याझ्वलय् नुगःखँ तयेगु झ्वलय् टेलिभिजनया ख्यलय् स्वीदँ न्ह्यःनिसें नेपालभाषाया ज्याझ्वः न्ह्याकाः वयाच्वनागु पलाः थीथी च्यानलय् थीथी ज्याझ्वः यानागु व छुं ई न्ह्यः न्ह्याःगु नेवा ज्याझ्वः ‘झीगु सः ’ आः सिजन टूया रुपय् निरन्तर न्ह्याकाः भाषा संस्कृति, साहित्य, संगीत व संकिपा ख्यःया खँ न्ह्यब्वया यंकेगु खँ निर्माता निर्देशक असंबरें कनादिल ।

ज्याझ्वलय् नांजाःम्ह कलाकार नारायणदेवी प्रधान, कलाकार एवं सन्चारकःमि रामकृष्ण खडगी, सन्चारकःमि नबिन जोशी, कलाकार रुपेन्द्र श्रेष्ठ व समाजसेवी अशोक श्रेष्ठपिन्सं नुगःखँ तयेगु झ्वलय् सन्चार माध्यमय् नेवाः भाय्यात थुकथं थाय् कया यंकेफत धाःसा भाषा संस्कृतिया संरक्षण जुइगु विचाः तयादीगु खः ।

Categorized in कला