Header Nepal rastra bank Adv

एन्फा नायः पदय् शेर्पा बुइधुंकाः फुटबल प्रशिक्षक अल्मुताइरी विदा जुइफु !

नेवा: अनलाइन न्युज – ललेन्द्र शाक्य | २०७९ आषाढ ७, मंगलबार १२:४५:०६

अखिल नेपाल फुटबल संघय् गणेश थापाया ताःहाकःगु ईया राज २२ दँ ताःहाकःगु युग समाप्त यासें नायः जूम्ह कर्माछिरिङ शेर्पा न्यादँ जक नेतृत्वय् च्वनेफत । शेर्पायात बुकाः महावीर क्लबया पुलांम्ह कासामि पंकजविक्रम नेम्वाङ नायः जूगु दु ।

मुक्कं ८४ मत कुतुंवंगुलि शेर्पां ३९ मत काःबलय् नेम्वाङं ४५ मत काःगु खः । नेम्वाङ २०७४ सालय् शेर्पाया हे प्यानलं उपाध्यक्ष पदय् निर्वाचित जूगु खः ।

शेर्पा बुइधुंकाः नेपाली फुटबल पुचःया प्रशिक्षक अब्दुल्लाह अल्मुताइरी तकं बिदा जुइगु सम्भावना खनेदूगु दु । अल्मुताइरीलिसे नेम्वाङ असन्तुष्ट जुयाच्वंम्ह खः । थ्व विषयस एन्फाया चुनावय् अल्मुताइरीया विषय नं मुद्दा जुयाः खनेदूगु दु ।

एन्फा नायः पदया चुनावय् नेपाली कांग्रेस लिक्क लाःपिं हे मैदानय् दूगु खः । कर्माछिरिङ शेर्पा पूर्वमहामन्त्री प्रकाशमान सिंह लिक्क लाःम्ह कथं कयातःगु दु । पूर्वमन्त्री नरेन्द्रविक्रम नेम्वाङया काय् पंकजविक्रम नेम्वाङया सभापति शेरबहादुर देउवा व कोइराला परिवार निगूलिसें हे लिक्कलाःगु स्वापू दु । मेम्ह उम्मेदवार राजीव पौडेलं धाःसा नेम्वाङयात लिपांगु इलय् साथ ब्यूगु खः ।

Categorized in कासा