ad prabhu

एनप्याब्सनया न्वकू सिनाच्वंगु अवस्थाय्, आशंका हत्या !

नेवा: अनलाइन न्युज – ललेन्द्र शाक्य | २०७७ बैशाख १२, शुक्रबार १०:२६:४०

नीजि स्कूलया संगठन एनप्याब्सनया केन्द्रीय न्वकू कृष्णप्रसाद भुसाल सिनाच्वंगु अवस्थाय् लुयावःगु दु ।

कैलालीया गौरीगंगा नगरपालिकाय् च्वंगु विहानी क्षितिज बोर्डिङ्ग स्कूलया संचालक तकं जुयाच्वंम्ह भुसालया सीम्ह बिहिवाः बहनी लुयावःगु  जिल्ला प्रहरी ज्याकुथि कैलालीं जानकारी ब्यूगु दु ।

गौरीगंगा नगरपालिका वडा ल्याः ९ च्वनीम्ह ४० दँया भुसालया सीम्ह घोडाघोडी नगरपालिका १० पहलवानपुर बजारं थ्यंमथ्यं १ किलोमिटर पश्चिमय् लुयावःगु खः । प्रहरीया कथं वया मिखा, म्हुतु व पुलिइ घाःपाः जुयाच्वंगु खनेदु ।

घटनाबारे अनुसन्धान जुयाच्वंगु जिल्ला प्रहरी ज्याकुथि कैलालीया प्रवक्ता प्रहरी नायव उपरीक्षक दक्ष बस्नेतं जानकारी ब्यूगु दु । निम्हेसित नियन्त्रणय् कयाः न्यनेकने जुयाच्वंगु बस्नेतं धाःगु दु ।

इलाका प्रहरी ज्याकुथि मालाखतीया प्रहरी नायव उपरीक्षक ज्ञानबहादुर विष्टं टोलीं घटनास्थलय् थ्यंकाः अनुसन्धान याःगु बस्नेतं जानकारी ब्यूगु दु ।

स्थानीयबासीं धाःसा एनप्याब्सनया न्वकू कृष्णप्रसाद भुसालया हत्या जूगु धासें अपराधीयात गिरफ्तार यानाः कडा सजायँ बिइत माग याःगु दु ।

Categorized in दुर्घटना-अपराध