Header Nepal rastra bank Adv

एनआरएनएपाखें राष्ट्रिय आविष्कार केन्द्रयात १२ लख ८७ हजार ग्वाहालि

नेवा: अनलाइन न्युज – ललेन्द्र शाक्य | २०७९ आषाढ ९, बिहिबार १५:०५:०७

गैरआवासीय नेपाली संघ (एनआरएनए)पाखें राष्ट्रिय आविष्कार केन्द्रयात १२ लख ८७ हजार ५८० तका आर्थिक ग्वाहालि याःगु दु । संघया कार्यकारी नायः कूल आचार्यं बुधवाः राष्ट्रिय आविष्कार केन्द्रया संस्थापक महावीर पुनयात उगु रकम लःल्हाःगु खः ।

आर्थिक ग्वाहालि लःल्हायेगु ज्याझ्वलय् आविष्कार केन्द्रया संस्थापक पुनं आविष्कारया नितिं एनआरएनं याःगु ग्वाहालियात लसकुस यासें सुभाय् देछाःगु दु । पुनं नेपालय् ९२ निसें ९४ प्रतिशत सामान आयात जुइबलय् आपालं रकम विदेशय् वनाच्वंगु धासें स्वदेशय् हे उत्पादन यायेफत धाःसा व्यापार घाटा म्हो जुइगु धाःगु दु ।

राष्ट्रिय आविष्कार केन्द्र छुं छगू क्षेत्रय् मजूसे प्रदेशस्तर व पालिकास्तरय् चायेकेमाःगु पुनया धापू खः । गैरआवासीय नेपाली संघं आविष्कार केन्द्र पलिस्था यानाः न्हूपिं प्रतिभावान व्यक्ति उत्पादन यायेमाःगु पुनया धापू दु ।

एनआरएनएया नायः आचार्यं विदेशय् सयेकूगु ज्ञान, सीप व लगानाी नेपालय् लःल्हायेत राष्ट्रिय आविष्कार केन्द्रथें जाःगु संस्था पायछि जूगु धाःगु दु । एनआरएनएं पवित्र नुगः कुबियाः न्ह्यानाच्वंगु राष्ट्रिय आविष्कार केन्द्रयात सदां ग्वाहालि यायेत तयार दूगु आचार्यया धापू दु ।

Categorized in लजगाः