उदाय् समाजं थ्वहे चैत २१ गते न्ह्याकेत्यंगु निक्वःगु उदाय् मुना ज्याझ्वलय् मनोरन्जन तयारीया ज्या न्ह्याःगु दु । थुगु उदाय् मुनाया मनोरञ्जनय् म्ये, हुलाप्याखँ फेशन शो, सांस्कृतिक फेशन शो, नेवाः तजिलजि  शो, सितारवादन लगायतया ज्याझ्वः न्ह्याकीगु जूगु दु । थुगु मनोरञ्जनपाखे करीव १२ गूलिं मल्याकया म्ये, करीव ११ ग मल्याकया हुलाप्याखँ, कान्तां दबदब पुचःया फ्यूजनकथंया प्रस्तुति आदि तसकं हे न्ह्याइपुक न्ह्याकेगु तयारी जुयाच्वंगु दु । उदाय् समाजया मूदुजः अन्जना ताम्राकारया  संयोजकत्वय् न्ह्याकेत्यंगु थुगु मनोरञ्जन ज्याझ्रवः नेपाःया च्वन्ह्याम्ह कोरियाग्राफर प्रसान्त ताम्राकारया कोरियोग्रीफिइ न्ह्याय्त्यंगु खः । म्ये हालामिपिं रमेश ताम्राकार, पवित्र कसाः, भीम तुलाधर लगायत न्हूपिं व पुलांपिं कलाकारपिन्सं म्ये न्ह्यब्वय्त्यंगु दु । थुगु मनोरञ्जन ज्याझ्वलय् फेशन शो नापं याना करीव सत्या (१५०) म्ह कलाकारपिन्सं ब्वति काइगु लजूगु दु ।

थुगु निक्वःगु उदाय् मुनाय् करीव २७ गू ज्याझ्वः न्ह्यब्वय्गु तयारीकथं   ज्या न्ह्याकाच्वंगु दु ।  थौंया युगकथंया लकसय् उदाय्तय्त नं न्ह्योने न्ह्याकाः युग नापया आवश्यकतायात कःघाना न्ह्याःवनेगुया नापं उदाय्त नं सक्षमकथं न्ह्याःवनेमा धैगु धारणा ज्वना हे थुकथंया तयारी नं यानाच्वंगु खः   लोकंह्वाम्ह  गायक भीम तुलाधरं नं ज्याझ्वलय् संयोजनया भूमिका म्हिता न्ह्योब्वय्त्यंगु थुगु उदाय् मुनाया मनोरञ्जन ज्याझ्वलय् वरिष्ठ सितारवादक तारावीरसिंह तुलाधरं नं सितारवादन न्ह्योब्वइगु जूगु दु ।  कालाकारपिन्सं तसकं हे उत्साहित रुपं थःगु प्रतिभा न्ह्यब्वय्त माःकथं प्रशिक्षण कया तयारी नं न्ह्याकेधुंकूगु दु । निक्वःगु उदाय् मुनायात थःगु कला न्ह्यब्वय्गुकथं नं थ्व ज्या जू वनाच्वंगुलिं उदाय् मुना छगू थःगु व्यतित्व विकासया नितिं नां आधार जूवनिकथं कया वयाच्वंगु दु ।

स्वनिगः येँया छगू सुसंस्कृति व सभ्य समुदायकथं कया वयाच्वंगु उदाय् समुदाय दथुइ एकता क्वातुकेगु आज्जु ज्वना येँया भृकुति मण्डपया क्यब प्रदर्शनी मार्गय् येँया गुंगू थरया उदाय्त मुना निक्वःगु उदाय् मुना तःजिक न्ह्याकेत्यंगु    खः । उदाय् संस्कृति, संस्कार, रितिथिति, पेशा आदि न्हूगु पुस्तायात परिचित जुइकेगुकथं व जि उदाय् धैगु गौरव भाव ब्वलंकेया निंतिं जू वनाच्वंगु थुगु उदाय् मुना ताःलाकेया निंतिं भिंmनिगू उपसमिति दय्का ज्या न्ह्याकेगु याःगु खः । सुथसिया १० ताः इलंनिसें सनिलया ६ ताः ई तक न्ह्याइगु थुगु निक्वःगु उदाय् मुनाय् संस्कृति, संस्कार, रितिरिवाज, पेशाया ब्वज्या, उदाय् शीप, व्यवसाय प्रदर्शन व विक्रीया स्टल, उदाय् नसाः, नसा समारोह, म्ये, प्याखँ, फेशन शो सम्बन्धी मनोरञ्जन ज्याझ्वः, मस्तय्गु ख्यः आदि थीथी ज्याझ्वः याना थुगु मुना ताःलाकेगु ग्वसाः उदाय् समाजं ग्वःगु दुृ ।
 येँय् दिगुद्यः व आगंदुपिं गुंगू थरया उदाय्तय्गु सहभागिताय् न्ह्याइगु थुगु उदाय् मुनां उदाय्तय् दथुइ थःगु जातीय भावना थहां वया जि उदाय् धैगु गौरव थकया उदाय्तसें नं राष्ट्र व समाजया निंतिं अतुलनीय ज्या न्ह्योने न्ह्याका वनि धैगु आशा कयाच्वंगु दु  ।

येँया उदाय्त तुलाधर, ताम्राकार, कंसाकार, स्थापित, सिख्राकार बनिया, सिन्दुराकार, शिलाकार, सेलालिकपिं आपालं ल्याखय् मुना थुगु उदाय् मुना न्ह्याइगलिं वनं पवथ्व मुना छगू ऐतिहसिक जूवनिगु नं खनेदु । समन्वय व सद्भाव हे थौंया दकले तःधंगु आवश्यकता खः उकिं उदाय्तय् दथुइ समन्वय व सद्भावया वातावरण ब्वलना उदाय् समुदाययात थःम्हं नं छुंकथंया विशेष भूमिका म्हिते धकाः न्ह्याःवइगु थुगु उदाय् मुनाया प्रभावं पिहां वइ धकाः नं समाजं आशा काःगु दु ।

थौं पहिचानया मुद्दा देशय् न्ह्याःवयाच्वंगु इलय् उदाय्तय्सं थःगु पहिचान गुकथं खः धकाः नं थुगु मुनाया थीथी ज्याझ्वलं उदाय्त गुकथं खः धकाः सीका काय्त नं थ्व तःधंगु तिबः बिइगु खनेदु । थनि निला न्ह्योनिसें माःमाःकथंया तयारी ज्या करीव क्वचाय्का न्ह्याकेत्यंगु थुगु मुनाय् करीव न्याद्धलं मल्याकया उदाय्त छगू हे थासय् सहभागी जुया थवंथवय् खँल्हाबल्ला याय्गुया लिसें छगू ठोस पलाखय् न्ह्याःवनेत नं आधार चूलाइगु खनेदु  । थौं हरेक समुदायलं थःगु समुदायप्रति थःगु जातीय गौरवकथं युवा जमातं बांलाक थुइका महय्गु व च्यूताः मतया वनाच्वंगु अवस्थाय् थुकथंया सोचं कन्हय् थःगु जातीय अस्तित्व तकं न्हना वनिगु वाःचाय्का हे “जि उदाय्” धैगु गौरव जूगु भावना ब्वलंकेगु आज्जु ज्वंगु नं थौंया इलय् तसकं हे समसामयिक जूगु सः पिदना वयाच्वंगु दु । ताःहाकःगु समन्वय व संघर्ष याना सफलता पूर्वक क्वचाय्केगु ताःतुना ज्या न्ह्याका वयाच्वंगु दुसा उगु समन्वयतां हे नेवाः एकतायात नं क्वातुक बः बिइगु खनेदु ।

न्हापांगु उदाय मुना किपाय् (किपा : च्वमि)