नेवा: अनलाइन न्युज – ललेन्द्र शाक्य | २०७९ चैत्र ३, शुक्रबार ११:३९:१५

न्हूबानेश्वरय् च्वंगु संघीय संसद भवनय् थौं शुक्रवाः सुथसिया १० ता ईनिसें उपराष्ट्रपति ल्ययेगु नितिं मतदान न्ह्याःगु दु । न्हिनय् ३ ता ईतक न्ह्याइगु उगु मतदानय् स्वम्ह उम्मेदवार दु । तर उपराष्ट्रपतिया निम्ह उम्मेदवारपिन्सं धाःसा थःम्हं थःत हे मत तयेमदइगु जूगु दु ।

एमालेपाखें उम्मेदवार जूम्ह अष्टलक्ष्मी शाक्य व जनमत पार्टीया उम्मेदवार जूम्ह ममता झा नं थःपिन्त मतदान बिइमदइगु जूगु खः । इपिं निम्ह संघीय व प्रदेश सांसद मजूगुलिं मतदानय् सहभागी जुइमखनीगु जूगु खः ।

मतदानय् संघीय सांसद व प्रदेशसभाया दुजः यानाः ८८१ म्हेस्या मतदान यायेखनी । उपराष्ट्रपतिया उम्मेदवार रामसहाय प्रसाद यादवं मतदान यायेधुंकूगु दु । उपराष्ट्रपतिया निर्वाचनय् एमालेया उम्मेदवार शाक्य व जसपाया उम्मेदवार यादवदथुइ मू धेंधेंबल्ला जुइगु खनेदु ।

Categorized in राजनीति