coved ad

उपन्यासकार निलम कार्की निहारिकायात ‘गंकी धुस्वां–बसुन्धरा सिरपाः’

नेवा: अनलाइन न्युज – Bijay Ratna | २०७८ पौष २५, आइतबार १०:४६:०७

नेपालभाषाया न्हापांम्ह उपन्यासकार धुस्वां सायमिया लुमन्तिइ नीस्वनातःगु ‘गंकी धुंस्वां–बसुन्धरा प्रतिष्ठान’पाखें थुगुसीया ‘गंकी धुस्वां–बसुन्धरा सिरपाः’ खस नेपालीभाषाया उपन्यासकार निलम कार्की निहारिकायात बिइगु घोषणा यागु खःसा थुगुसीया ‘धुस्वां सायमि सिर्जना सिरपाः’ वरिष्ठ कलाकार गोविन्दलाल सिं डंगोलयात बिइगु निर्णय याःगु दु ।

गंकी धुंस्वां–बसुन्धरा प्रतिष्ठानया नायः लिसें धुस्वां सायमिया काय् डा. अरुण सायमिया नायःसुइ च्वंगु बैठकं थ्व खँ क्वछिउगु खः ।

नेपालभाषाया न्हापांम्ह उपन्यास सम्राट धुस्वां सायमि व वयकःया जहान बसुन्धरा मानन्धरया नामं नीस्वनातःगु उगु सिरपाः नेपाः दुनेया विविध भाषाया उपन्यासकारपिन्त निदँय् छक्वः बिइगु यानावयाच्वंगु खःसा धुस्वां सायमि सिर्जना पुरस्कार संगीत व कला क्षेत्रया श्रष्टापिन्त बियाः वयाच्वंगु दु ।

निगुलिं सिरपाय् ५०,००० (न्येयद्वः तका दां)  व ताम्रपत्रपाखें हनीगु खः ।

सिरपाः क्वछिइगु निंतिं निगू बिस्कं सिफारिस समिति गठन यानातःगु दु । उकिमध्ये  गंकी धुस्वां बसुन्धरा सिरपाः क्वछिइगु निंतिं साहित्यकार विमल भौकाजीया कजिसुइ कवि नवीन चित्रकार व कवयित्री प्रतिसरा सायमि दुजः कथं तयातःगु दुसाः धुस्वां सायमि सिर्जना सिरपाः क्वछिइगु नितिं वरिष्ठ कलाकार हरिप्रसाद वैद्यया कजिसुइ युवाकवि सुरेश किरण मानन्धर व कवयित्री प्रतिसरा सायमि दुजः कथं दु ।

गंकी धुस्वां–बसुन्धरा सिरपाः नेपालभाषा, खस नेपाली व नेपाःया विविध भाषाया उपन्यासकारपिन्त पालंपाः बिइगु यानाः वयाच्वंगु दु। निदँय् छक्वः घ्यःचाकु संल्हु  माघ १ गते छगू तःजिगु ज्याझ्वःया दथुइ लःल्हायेगु यानाः वयाच्वंगु दु । उपन्यासकार धुस्वां  सायमिया नां गोविन्दबहादुर मानन्धर खः । वयकः ने.सं. १०५० बछलागा एकादशीकुन्हु जन्म जूम्ह खः ।

वयकलं  नेपालभाषा, खस नेपाली, हिन्दी व अंग्रेजी भाषाय् थःगु कलम न्ह्याकादीगु दु । वयकःया च्वज्या बिषयवस्तु कविता, बाखं, प्याखं व उपन्यास खः । वयकःया कीर्तिया खँ ल्हाना वनेबलय् न्हापां ल्वापु बाखं, धर्मोदय , ३÷३१ ने.सं. १०७० स पिदंगु खः ।

अथेहेतुं न्याफोस्वां बाखं मुना, ने.सं. १०७०, त्रिवेणी प्याखं मुना, ने.सं. १०७२, मूस्वां चिबाखं, ने.सं. १०७४,  मिसा उपन्यास ने.सं. १०७४ स पिदंगु खःसा थ्व उपन्यास श्रेष्ठ सिरपाः त्याकेत ताःलाःगु ख ।

ब्वाला बाखं, ने.सं. १०७४, ह्याउँनिभाल प्याखं, ने.सं. १०७६, मतिना उपन्यास, ने.सं. १०७७, पासा उपन्यास ने.सं. १०७८, श्रेष्ठ सिरपाः लाःगु गंकी उपन्यास, ने.सं. १०७८, पल्पसा उपन्यास, ने.सं. १०७९, मय्जु उपन्यास , ने.सं. १०८६ , फिसःया लिसः उपन्यास, ने.सं. १०८६, माखा उपन्यास, ने.सं. १०८९, जि भ्वातिं जि सतः उपन्यास ,ने.सं. ११००, अगति उपन्यास, ने.सं. ११०२, निभाः उपन्यास, ने.सं. ११०५ , मंगा उपन्यास, बि.सं. २०४७, धुस्वांया कविता, ने.सं. १११६ खः ।

वयकलं वेँ सफू सम्पादन ने.सं. १०७१ यानादीगु दु । थुकथं हे वयकलं श्रेष्ठ सिरपाः ने.सं. १०७४, १०७८ सः कयादीगु दु । अथेहे वयकःया उपाधि ः साहित्य सुता , ने.सं. १०९५, भाषाथुवाः ने.सं. १११८ सालं विभूषित याःगु दु । थुकथं हे वयकलं विभूषणया रुपय्  प्रबल गोरखा दक्षिण बाहु प्यंगूगु कयादीगु दु ।

वयकलं दकले न्हापां व दकले अप्पो १४ गू उपन्यास च्वयादीगु दु  । वय्कःया उपन्यासय् समकालिन समाजया यथार्थ किपाः व नेवाः मिसाया अहं व्यक्तित्वया लू खनेदु  ।

Categorized in कला