उपचुनावया मेगु अस्त्र : बामदेवयात सांसद दयेकेत
नेवा: अनलाइन न्युज – ललेन्द्र शाक्य | २०७७ बैशाख १९, शुक्रबार ११:४६:१६
नेपाल कम्युनिष्ट पार्टी दुने न्वकू बामदेव गौतम ‘तासया सुरथे एक्का’ जूगु दु । विवाद उत्कर्षय् थ्यंगु इलय् २० बैशाखय् सचिवालय बैठक च्वनेत्यंगु दु । उकिं वार या पारया लँपु दयेकीगु आशा नं याःगु दु ।
प्रधानमन्त्री केपी शर्मा ओलीं थः याकःचिके संसदीय दलय् बहुमत मदयेधुंकाः बामदेव गौतमयात प्रधानमन्त्री दयेकेगु प्रस्ताव यायेधुंकूगु दु । तर, बामदेव सांसद धाःसा मखु । वयात राष्ट्रियसभाय् यंकूसां नं संविधानं प्रधानमन्त्री याके बिइमखु । बामदेवयात ओलीं वास्तवय् हे प्रधानमन्त्री यायेत ग्वाहालि यायेत्यंगु खःसा विकल्प मदूगु मखु ।
कि मखुसा बामदेवं मेगु चुनाव पिइमाल कि मखुसा उपचुनावं त्याकाः वयेमाल । रवीन्द्र अधिकारीया हेलिकोप्टर दुर्घटना लिपा बामदेवं उम्मेदवार जुइगु तयारी मयाःगु नं मखु । तर, पोखरापाखें वया विश्वासपात्रपिन्सं अन्तरघातया पूर्वतयारीया सुचं छ्वयाहल । अले बामदेव लिचिल । रवीन्द्रया कलाः विद्यां चुनाव त्याकल ।
बामदेवं राष्ट्रियसभाय् वनेत शर्त तःगु खः । वं संविधान संशोधन यानाः राष्ट्रियसभा दुजः प्रधानमन्त्री जुइदइगु प्रावधान तयेत धाल । तर, ओली–प्रचण्ड लिसेंया नेतापिं ‘तैं चुप मैं चुप’ जुल । आः बामदेवयात प्रधानमन्त्री यायेगु प्रस्ताव ओलीपाखें वःगु दु । विकल्प मदूगु मखु । उकिया नितिं अर्थात् बामदेवया नितिं छुं सिट खाली यायेमाः । बामदेवयात सिट त्वःतेत तयार जूपिं नं मदुगु मखु ।
येँया रामवीर मानन्धरं येँपाखें सिट त्वःते धाःगु खः । रामवीरं त्याकूगु क्षेत्र नेकपाया सुरक्षित क्षेत्र खः । तर, लिपा खँ स्यन । न्ह्याग्गु थजू, उलि न्वःवाःबलय् रामवीर मानन्धरं सिरपाः कथं शहरी विकास मन्त्रालय दुने राज्यमन्त्री जुइगु मौका कायेखन ।
बामदेवया नितिं उपचुनाव याकेत मफइगु मजूगु नेकपा दुने हे धायेगु यानाहःगु दु । डोल्पापाखें धनबहादुर बुढां त्वःताः बामदेवयात चुनाव ल्वाकेगु विषय नं वःगु खः । तर, खँ स्यन । आः पाल्पाया दलबहादुर रानामगर बामदेवया नितिं त्वःतेत तयार जूगु सीदूगु दु । दलबहादुर बामदेवया विश्वासपात्र खः । व पाल्पां सानदार मत हयाः त्याःम्ह सांसद खः । पाल्पा नेकपाया गढ कथं कयातःगु दु ।
कास्कीया खगराज अधिकारीया नं खँ मवःगु मखु । उगु लागा नं नेकपाया गढ कथं कयातःगु दु । तर, खगराजं त्याकूगु सिबें दानबहादुरं त्याकूगु क्षेत्रय् च्यूताः तःगु दु ।
बामदेवयात धात्थें हे प्रधानमन्त्री यायेत्यंगु खःसा थुखेपाखे प्रक्रिया न्ह्याकेमाःगु बामदेव पक्षधरया धापू पिहाँ वःगु दु । थुकिया नितिं ओलीया विश्वासपात्रपिंलिसे बामदेवया मनूतसें खँ ल्हायेगु ज्या यानाहयेधुंकूगु दु ।