नेवा: अनलाइन न्युज – ललेन्द्र शाक्य | २०७७ जेठ २२, बिहिबार ११:५७:३६

‘प्रहरीलिसे ल्वायेत तयार ः थौंनिसें व्यवसाय न्ह्याकेगु जुइ’ –उद्योगी व्यवसायी

स्वास्थ्य व जनसंख्या मन्त्रालयया कथं म्हिगः बुधवाःतक देय् न्यंकं कोरोना संक्रमितया ल्याः २३०० थ्यंगु दुसा थौं बिहिवाः सुथय् गण्डकी प्रदेशय् थप १६ म्हेसिके संक्रमण पुष्टि जूगु दु ।

उद्योगी व्यवसायीपिन्सं थौं बिहिवाःनिसें लकडाउनयात थप अवज्ञा यायेगु घोषणा याःगु दु ।

लिपांगु छुं दिंनिसें थीथी थासय् चिचीधंगु ल्याखय् अवज्ञा यानाः वयाच्वंपिं व्यवसायीपिन्सं थौं बिहिवाःनिसें धाःसा तःधंगु ल्याखय् बजाःया पसःत चायेकेगु धाःगु खः ।

नेपाल उद्योग वाणिज्य महासंघया न्वकू किशोर प्रधानं थौं बिहिवाःनिसें देय् न्यंकंया पसःत चायेकेत आह्वान तकं याःगु दु ।

महासंघया न्वकू प्रधानं पसःत चायेकेगु क्रमय् प्रहरीलिसे ल्वापु जुइगु सम्भावना दूगुलिं व्यवसायीपिनिगु पाखें नं तयारी यानागु दाबी याःगु दु । राज्यलिसे ल्वापु तकं जुइफूगु धासें प्रधानं तयारीया लिसें व्यवसायी थःथःपिगिनु पेशाय् लिहाँ वइगु धाःगु दु । प्रधानं धाःगु दु, “देय् न्यंकं ल्वापु जुइफु, व्यवसायीं नं तयारी याःगु दु । लिसः बिइत जिपिं नं तयार दु ।”

सरकारं कोरोना नियन्त्रण यायेमफूगु तर लकडाउन जक थप यायेगु ज्या जुयाच्वंगुलिं व्यवसायीपिं अवज्ञा यायेत बाध्य जूगु प्रधानया धापू दु ।

थ्वसिबें न्ह्यः राजधानीया नुगःचु कथं कयातःगु दरबार मार्गया व्यवसायी व चाःबही–जोरपाति क्षेत्रया व्यापारीपिन्सं तकं म्हिगः बुधवाःनिसें व्यवसायस लिहाँ वये दयेमाःगु मागलिसें प्रदर्शनय् क्वाहाँ वःगु खः ।

जनस्तरपाखें लकडाउनया मोडालिटी हिलेमाःगु तच्वःगु सः थ्वयेधुंकाः सरकारं तहगत रुपं लकडाउन छ्वासुकेगु तयारी न्ह्याकूगु दु । उकिया तयारी कथं प्रधानमन्त्री केपी शर्मा ओलीं म्हिगः बुधवाः थीथी क्षेत्रया विज्ञपिंलिसे सहलह तकं ब्याकूगु दु ।

स्वास्थ्य व जनसंख्या मन्त्रालयया कथं म्हिगः बुधवाःतक देय् न्यंकं कोरोना संक्रमितया ल्याः २३०० थ्यंगु दुसा थौं बिहिवाः सुथय् गण्डकी प्रदेशय् थप १६ म्हेसिके संक्रमण पुष्टि जूगु दु ।

Categorized in बजाः