Mohanai 2078 KTM

ई चीहाकः, छुं यानाःतुं त्वःते : मन्त्री झाँक्री

नेवा: अनलाइन न्युज – ललेन्द्र शाक्य | २०७८ आश्विन २४, आइतबार १२:४४:३२

सहरी विकासमन्त्री रामकुमारी झाँक्रीं वर्तमान सरकारयात फुक्क नागरिकया सरकार खः धैगु प्रत्याभूत याकेगु प्रतिबद्धता प्वंकूगु दु ।

नेकपा एकीकृत समाजवादी तनहुँपाखें मोहनीया लसताय् शनिवाः दमौलीइ ग्वसाः ग्वःगु भिंतुना कालबिल ज्याझ्वलय् मन्त्री झाँक्रीं पार्टीं थःपिन्त ब्यूगु जिम्मेवारी कुशलतापूर्वक निर्वाह यायेगु धाःगु दु ।

भ्रष्टाचार, कुशासन, गैरजिम्मेवारीपनया प्रवृत्रिया विरुद्धय् विगतनिसें हे ल्वानाः वयागु व वइगु दिनय् नं वहे विरुद्ध ल्वायेगु मन्त्री झाँक्रीं उद्घोष याःगु दु । मन्त्री झाँक्रीं ई यक्व मदुगुलिं जनअपेक्षा कथं ज्या यायेगु धासें धाःगु दु, ‘जिमिके ई मदु धकाः च्वनेगु छुट मदु, ई चीहाकः तर छुं नं छुं यानाःतुं त्वःते ।’

मन्त्री झाँक्रीं न्यायोचित विकासया पक्षय् च्वनाः ज्या यायेगु धासें धाःगु दु, ‘गुल्मीं मन्त्री नल धायेवं गुल्मीइ जक विकास मखु, जुम्ला व हुम्लाय् नं विकास जुइमाः, न्यायोचित विकासया पक्षय् जि दु ।’

मन्त्री झाँक्रीं स्मार्ट सिटी जक मजुसे च्वनेगु योग्य सहर दयेकेगुपाखे मन्त्रालयं ध्यान बिइगु धाःगु दु ।

ज्याझ्वलय् श्रम, रोजगार व सामाजिक सुरक्षामन्त्री कृष्णकुमार श्रेष्ठं वैदेशिक रोजगारया सवालय् जुयाच्वंगु दलाली व विकृति अन्त्य यायेगु धाःगु दु । समाजवादोन्मुख राज्य प्रणाली पलिस्थाया नितिं नीति, कानून व मापदण्ड दयेकेगु धासें मन्त्री श्रेष्ठं श्रमिकपिन्सं श्रमया मू कायेमखनीगु अवस्थाया पूर्ण रुपं अन्त्य यायेगु धाःगु दु ।

कोभिड महामारीया हुनिं थ्यंमथ्यं १५ लखं रोजगारी गुमेयाःगु धासें मन्त्री श्रेष्ठं राजेजगारी गुमेयाःगुया पुनःस्थापना आःया हाथ्या जूगु धाःगु दु ।

मन्त्री श्रेष्ठं धाःगु दु, ‘फुक्क क्षेत्रलिसे समन्वय यानाः फयांफतले देय् दुने हे रोजगारया ह्वताः ब्वलंकेगु व आत्मस्वाभिमानया लिसें ज्या यायेगु लकसया नितिं पहलकदमी कायेगु जुइ ।’

औद्योगिक क्षेत्रय् श्रमिकपिन्त जुइगु शोषणया अन्त्य यायेगु धासें मन्त्री श्रेष्ठं औद्योगिक निकायलिसे सहलह यानाः दीर्घकालीन समाधानया ज्या यायेगु धाःगु दु ।

ज्याझ्वलय् एकीकृत समाजवादीया पोलिटब्यूरो दुजः प्रतापलाल श्रेष्ठ, केन्द्रीय दुजः कलिला खान, रेखा थापा बस्याल लिसेंयापिन्सं तनहुँ जिल्लाय् एकीकृत समाजवादीया संगठन सुदृढीकरणय् ध्यान बिइगु धाःगु दु ।

Categorized in राजनीति