prabhu baink new

ईश्वर पोखरेलया सम्धी राष्ट्रिय वाणिज्य बैंकया अध्यक्ष...!

नेवा: अनलाइन न्युज – ललेन्द्र शाक्य | २०७७ भाद्र १०, बुधबार ०९:४३:२४

देसया छगू जक पूर्ण सरकारी स्वामित्वया बैंक राष्ट्रिय वाणिज्य बैंकया अध्यक्षय् प्रा.डा. उपेन्द्रकुमार कोइराला नियुक्त जुइगु जूगु दु । कोइराला उपप्रधानमन्त्री व रक्षामन्त्री ईश्वर पोखरेलया सम्धी अर्थात् काय्या ससःअबु खः ।

कोइरालायात नेपाल सरकार मन्त्रीस्तरपाखें याःगु निर्णय नं सोमवाः बैंकया संचालकय् नियुक्त याःगु दु । बैंकया अध्यक्ष जुयाच्वंम्ह निर्मलहरी अधिकारीयात सरकारं राजश्व बोर्डय् छ्वयेधुंकाः खाली जूगु अध्यक्ष पद कोइरालायात बिइगु कथं संचालक नियुक्त याःगु खः ।

अध्यक्षया चयन संचालक समितिया निर्णयपाखें यायेगु व्यवस्था कथं आः थौं बुधवाः च्वनीगु संचालक समितिया बैठकं कोइरालायात अध्यक्ष चयन याइगु बैंक स्रोतं धाःगु दु ।

बैंकया संचालकय् आः अर्थमन्त्रालयया सहसचिव धनीराम शर्मा, जनककुमार बराल, प्रा.डा. राजनबहादुर पौडेल, रोमिला ढकाल उप्रेती व प्रा.डा. माधवप्रसाद दाहाल दु । बैंकया संचालकपिं मध्येपाखें अध्यक्ष ल्ययेमाःगु व्यवस्था दूगुलिं सरकारं कोइरालायात अध्यक्ष नियुक्त यायेत मेमेपिं संचालकपिन्त न्हापा हे धयाः आः संचालक जक नियुक्त याःगु खः ।

राष्ट्रिय वाणिज्य बैंक आः मुनाफा लिसेंया सूचकया आधारय् देशया हे न्हापांगु बैंक खः । बैंकया नेतृत्वय् नातावाद व सम्बन्धया आधारय् सुं व्यक्तियात यंकेगु पायछि मजूगु उगु क्षेत्रया जानकारपिन्सं धयाः वयाच्वंगु दु ।

कोइराला सु खः ?

कोइरालाया थ्वसिबें न्ह्यःया नियुक्ति व वं याइगु ज्या नं विवादित जुयाच्वंगु दु । वया नियुक्ति कायेगु झय्वलय् २०५१ सालपाखें हे न्ह्याःगु खः । तत्कालीन नेकपा एमालेया सरकार जूबलय् २०५१ सालय् खाद्य संस्थानया महाप्रबन्धक नियुक्त जुल । खाद्य संस्थान लिपा कोइराला महेन्द्र मोरंग क्याम्पसया क्याम्पस प्रमुखया नियक्ति काल ।

वधुंकाः नं कोइराला खाली च्वनेम्वाल, एमाले सरकार जुइखतं हे वं नियक्ति कयातुं त्वःतल । पोखरेल वाणिज्य व आपूर्ति मन्त्री जूगु इलय् कोइराला नेपाल आयल निगमया कार्यकारी अध्यक्ष नियुक्त जूगु खः ।

२०६२...२०६३ लिपा कोइराला उच्च माध्यमिक शिक्षा परिषदया उपाध्यक्षय् नियुक्त जूगु खः । उगु इलय् ला व झन हे विवादित जूगु खः ।

उगु इलय् गुणस्तरहीन उत्तर पुस्तिका खरिद यानाः भ्रष्टाचार याःगु धासें विवाद ब्वलंगु खः । थ्व विषयस सार्वजनिक लेखा समितिं छानविन यायेधुंकाः वं राजीनामा ब्यूगु खः ।

विवादय् लाःसां नं कोइरालां नियक्ति धाःसा कयातुं च्वन । मध्यपश्चिमाञ्चल विश्व विद्यालयया उपकुलपति जूबलय् वविरुद्ध आर्थिक अनियमितताया द्वपनय् खख्तियार दुरुपयोग अनुसन्धान आयोगय् उजुरु हे लात ।

विश्व विद्यालयस वविरुद्ध आन्दोलन हे जूगु खः । अनियमितता जूगु धासें विश्व विद्यालयस विद्यार्थीपिनसं निलातक तालाबन्दी याःगु खः ।

Categorized in राजनीति