२०७३ पौष १९, मंगलबार ११:३८:५८

इन्डोनेसियाया बयोबृद्ध सपरमान सोदीमेजों शनिवाः थःगु १४६ क्वःगु बुदिं न्यायेकल । वय्कःयात इतिहासया हे दकले बृद्ध मनू कथं दाबी याःगु दु ।

सोदीमेजोयाके इन्डोनेसियन म्हसीका पौ दु, गुकी वय्कःया बुदिं तिथि न्ह्यथनातःगु दु– ३१ डिसेम्बर १८७० । वयकलं थःथितिपिनिगु दथुइ च्वनाः इन्डोनेसिया सेन्ट्रल जाभाय् च्वंगु सेरागयन डिस्ट्रीक्टय् बुदिं न्यायेकूगु खः । बुदिंया पार्टीइ सोदीमेजोया छय् सुयोन्तो व वय्कःया जहान सुवर्नी लिसें इमि सन्तान एरिका कुर्नियावती व एनिसा कुर्तियावती नापनापं थःथितिपिनिगु उपस्थिति दूगु खः ।

१४६ दँया सोदीमेजोया १० म्ह दाजुकिजा व तःकेहेँपिं फुक्कं सीधुंकलसा प्यम्ह कलाःपिन्सं नं संसार त्याग यायेधुंकल । सोदीमेजोया काय् म्ह्याय्पिं नं थ्व संसार त्वःताः वनेधुंकल । आः वय्कःयात छय् व छुइपिनिगु छेँजःपाखें लहिनातःगु खः ।

पत्याः हे मजुइगु कथंया उमेरया जूसां नं १४६ दँया सोदीमेजो बृद्ध व्यक्ति आः तक नं थःहे न्यासी जुइफुनि । वय्कःया छम्ह छेँजः नं धयादी, “वय्कलं न्ह्याग्गु कथंया नसा नं नयादी व आःतक विरामी जुयाः द्यंगु नं मदुनि ।”

वय्कःया म्हसीका पौयात आधार माने यायेगु खःसा विश्वय् आःतकया हे दकले बृद्ध दाबी यानातःम्ह फ्रेन्च मिसा जेयन्ने काल्मेन्ट (गुम्हेसिया १२२ दँया उमेरय् मृत्यु जूगु खः)सिबें वय्कः यक्वः न्ह्यःने न्ह्याः वनेधुंकूगु दु ।

छय् सुर्यन्तोया कथं १२२ दँया उमेर पार यायेधुंकाः सोदीमेजो थःगु मृत्युया नितिं तयारी यानाः च्वनादीगु दु, तर मृत्युं वय्कःयात आःतक स्वःगु मदुनि । सुर्यन्तों धयादी, “वय्कलं २४ दँ न्ह्यः हे थःगु नितिं ग्रेभस्टोन (चिहानया स्तम्भ) दयेकाः तयादीगु दु । जिमिसं वय्कःया नितिं चिहानस्थल नं तयार यायेधुनागु दु, गुगु वय्कःया काय् म्ह्याय्पिनिगु लिक्क हे दु ।”

इन्डोनेसियाली अभिलेख ज्याकुथिया कर्मचारीं म्हसीका पौया आधारय् वय्कःया उमेर १४६ दँ जूगु धाःगु दु तर थुकिया स्वतन्त्र पुष्टि जुइ ल्यं दनि । वय्कः इतिहासया हे दकले बृद्ध मनू जूगु प्रमाणित यायेत वय्कःया भ्वँभिँतय्गु स्वतन्त्र परीक्षण यायेमालीगु जुइ । अथेला वय्कःसिबें न्ह्यः नाइजेरियाया जेम्स ओलोफिन्टुइ १७१ दँया व इथियोपियाया धाकाबो एब्बा १६३ दँया जूगु दाबी याःगु दु । तर इपिं निम्हेसिगु उमेर प्रमाणित  यायेगु भ्वँत  उपलब्ध जूगु मदु ।

छय्म्ह सुर्यन्तोया कथं थौंकन्हय्या दिनय् सोदीमोजो रेडियो न्यनाः दिं बिते याइ । मिखा कमजोर जूगुलिं वय्कलं टिभी स्वये मफु । लिपांगु ६ महिनानिसें वय्कःयात मेपिन्सं नसा नकेमाःगु व म्वः ल्हुकेमाःगु जूगु दु ।