इन्टर्नसीपको माग यासें चीनय् एमबीबीएस याःपिं विद्यार्थीपिं आन्दोलित
नेवा: अनलाइन न्युज – ललेन्द्र शाक्य | २०७८ भाद्र ३१, बिहिबार १३:४५:५०
चीनय् एमबीबीएस अध्ययन यानाः वःपिं विद्यार्थीपिन्सं ताःई जुइधुंकाः नं इन्टर्नसीप यायेमखंगु धासें येँया फिब्व ख्यः माइतीघरय् प्रदर्शन याःगु दु ।
चिकित्साशास्त्र कोर्ष पूवनेधुंकूसां नं इन्टर्नसीपया नितिं छुं सुनुवाइ मजुइधुंकाः सतकय् क्वाहाँ वयेमाःगु इमिसं धाःगु दु ।
इमिसं प्लेकार्डय् ‘इन्टर्नसीपय् छाय् ढिलासुस्ती ? अझ गुलि पिइगु ? १२ दिं धकाः लच्छि निला पिइकल, आः गुलि पिइकेगु ? स्पष्टीकरण माल, चिकित्सा शिक्षा आयोगया निर्णइ कार्यान्वयन या’ इत्यादी नारालिसें मंगलवाःनिसें फिब्व ख्यलय् प्रदर्शन यानाः वयाच्वंगु दु ।
थुकिया लिसें इमिसं नेपाल मेडिकल काउन्सिलया इन्टर्नसीप नियमया बुँदा ल्याः ३ तकं प्लेकार्डय् च्वयाः ध्यानाकर्षण याकूगु दु ।
उगु ३ ल्याः बुँदाय् धयातःगु दु, ‘विदेशय् अध्ययन यानाः नेपालय् हे इन्टर्नसीप यायेमाःगु छुं विशेष वा वाध्यात्मक परिस्थिति जूसा उगु परिस्थितिया जानकारी बिसें विद्यार्थीं थः ब्वनागु संस्था व नेपाल मेडिकल काउन्सिलया पूर्व स्वीकृति कयाः जक नेपाः दुनेया संस्थाय् इन्टर्नसीप यायेखनी । थुगु कथंया इन्टर्नसीप नेपाल मेडिकल काउन्सिलया नियम दुने च्वनाः यायेमाः ।’
Categorized in राष्ट्रिय