Header Nepal rastra bank Adv

इतिहासविद् गोवर्धन शर्माया सफू पितब्वज्या व सफू ब्वज्या

नेवा: अनलाइन न्युज | २०७९ आषाढ ५, आइतबार २०:१७:३८

राजोपाध्याय समाजया  ग्वसालय् येँया नेपाः ब्यांक्वेटय् शुक्रबार  जूगु छगू ज्याझ्वःया दथुइ  मदुम्ह इतिहासविद् सह प्राध्यापक गोवर्धन शर्माया समालोचना सफू ‘उपन्यासया चाकलय् गिरिजा’ या पितब्वज्याः जुउगु दु । उगु ज्याझ्वलय् वक्तातय्सं समालोचना विधाया विकासया नितिं समालोचकतयत प्रोत्साहित यायेमाःगुलि बः बियादिल ।नेपालभाषाया साहित्य क्षेत्रय् समालोचना विधां व्यापकता काय् मफूगुलिइ सरोकारवालातयसं चिन्ता प्वंकूगु दु ।

राजोपाध्याय समाजया ग्वसालय् जुउगु उगु ज्याझ्वःया वक्तातयसं समालोचनायात सुझावया रुपय् मकाःसे आलोचनाया रुपय् काइगु प्रवृत्तीया हुनिं थ्व विधाया विकास जुइमफूगु बिचाः प्वंकादीगु खः ।

ज्याझ्वलय् मदुम्ह इतिहासविद् सह प्राध्यापक गोवर्धन शर्माया समालोचना सफू ‘उपन्यासया चाकलय् गिरिजा’ या पितब्वज्याः याःगु खः ।

समालोचक पूर्णकाजी ताम्राकारयानापं नेवाः देय् दबूया नायः पवित्र बज्राचार्य, वरिष्ठ पत्रकार अले ईल्वहँ पब्लिकेशनया प्रबन्ध निर्देशक नरेशबीर शाक्यपिन्सं मंका कथं  सफूया पितब्वज्या यानादीगु खः ।

पितब्वज्या जूगु सफुतिइ नेपालभाषा साहित्य क्षेत्रया महाकवि गिरिजा प्रसाद जोशीया उपन्यासयात कया मदुम्ह इतिहासविद् सह प्राध्यापक शर्मां समालोचना यानादीगु खः ।

समालोचक ताम्राकारं साहित्य क्षेत्रय् गिरिजा प्रसाद जोशीया योगदानयात लुमंकुसें पितब्वज्या जूगु सफुतिं इतिहासविद् शर्मायाके दुगु समालोचकया खुबी ब्वःगु बिचाः प्वंकादिल ।

मदुम्ह गोवर्धन शर्माया काय् सुभाष शर्मां थः अबु मदुगु झिंन्यादँ लिपा वयकःया सफू प्रकाशन जूगुलिइ लसता प्वंकादिल । नेवाः देय् दबूया नायः पवित्र बज्राचार्य, नेवाः जातिय महासंघया नायः मनोज नेवाः खड्गी लगायतया वक्तापिन्सं  राजोपाध्याय समाजं थःगु पहिचान स्थापित यायेगु नितिं भाषा व संस्कृतिया संरक्षणय् विशेष ध्यान बीमाःगु खँय् बः बियादिल ।

ज्याझ्वलय् सफू पितब्वज्याया नापं थीथी पिकाकपिन्सं पिकाना तःगु  सफू ब्वज्या नं याःगु खः । ब्वज्याय् वेद, तन्त्र, नेपालया धर्म, संस्कार, संस्कृतिया नापं थीथी ख्यःलिसे सम्वन्धित सफूत तःगु खः ।

थुगु हे ज्याझ्वलय् कोरोना महामारीया इलय् संक्रमितया उपचारय् खटेजूपिं राजोपाध्याय स्वास्थ्यकर्मीत व २०७६ र ७७ सालमा एस।ई।ई परिक्षा पास जूपिं राजोपाध्याय विद्यार्थीतयत सम्मान नं याःगु खः ।

 

 

Categorized in नेवाः