Mohanai 2078 KTM

इक्वेडरया जेलय् दंगा, छ्यं पालातःपिंनिसें सीम्ह म्हसीके मफूगु अवस्थातक

नेवा: अनलाइन न्युज – ललेन्द्र शाक्य | २०७८ आश्विन १५, शुक्रबार ०७:५२:४५

इक्वेडरया जेलय् जूगु दंगाय् ११६ म्ह मनूत सीगु दु । मंगलवाः जूगु दंगा बुधवाःया ईतक न्ह्यात । प्यसःम्ह प्रहरी आधुनिक ल्वाभःलिसें दुहाँ वनेधुंकाः नियन्त्रणय् वःगु खः ।

जेलदुने निगू समूह दथुइ ल्वापु जूगु खः । छगू समूह मेगू समूहयात आक्रमण यायेत जेलया प्वालं दुहाँ वंगु खः ।

दंगालय् ज्वःगु ल्वाभः, बन्दुक व ग्रिनेडया तकं छ्यलाबुला जूगु सीदूगु दु । खुम्ह (६ म्ह) मनूतय्गु छ्यः पाःगु दु ।

घटनाय् लागूवासःया कारोवारी समूहदथुइ ल्वापु जूगु सीदूगु दु । थ्व हत्याकाण्ड जेलपिनेपाखें निर्देशित जूगु जुइफूगु आधारय् अनुसन्धान अप्वयेकूगु दु । थुकी मेक्सिकोया शक्तिशाली सिनालोआ ड्रग कार्टलया संलग्नताया आशंका याःगु दु । सिनालोआयात मेक्सिकोया हे मेगु ड्रग कार्टल जेलिस्को न्यू जेनेरेशन कार्टलं हाथ्या (चुनौती) ब्यूगु जुइफूगु अनुमान याःगु दु ।

जेलय् थःथितिपिं स्याःगु व घाःपाः जूगु सुचं वयेधुंकाः गुलिखे मनूत थ्यंकूगु दु । गुलिखे सीम्ह म्हसीके मफूगु अवस्थाय् च्याःगु जानकारी ब्यूगु दु । सीम्ह म्हसीकेत आपालं दिं तुइगु खनेदूगु दु । घटनाय् थःथितिपिं लाःगु या मलाःगु सिइकेत किपाः व भिडियो तकं छ्वःगु दु ।

Categorized in अन्तर्राष्ट्रिय