nepal investment baink

आसिफा औपचारिक रुपं राजनीतिइ दुहाँवल

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व एकादसी (२०८० चैत्र ७) बुधवाः

पाकिस्तानया राष्ट्रपति असिफ अली जरदारीया चीधिकःम्ह म्ह्याय् बीबी आसिफा भुट्टो जरदारी औपचारिक रुपं पाकिस्तानया राजनीतिइ दुहाँ वःगु दु ।

राष्ट्रपति जुइधुंकाः जरदारीया अबुं खाली याःगु राष्ट्रिय सभाया सिटया नितिं उम्मेदवारी बियाः वं पाकिस्तानय् औपचारिक रुपं राजनीतिक जीवनया सुरुवात याःगु खः ।

सिन्ध प्रान्तया एनए–२०७ निर्वाचन क्षेत्रय् जुइत्यंगु उपनिर्वाचनया नितिं आसिफां आइतवाः उम्मेदवारी दर्ता याःगु खः ।

आसिफां एनए–२०७ या उपनिर्वाचनया नितिं थःगु मनोनयन पौ पेस याःगु दु । आसिफा पतिनवाब शाहस्थित निर्वाचन अधिकारीया ज्याकुथिइ थ्यंकाः मनोनयन पौ लःल्हाःगु खः ।

पाकिस्तानया पूर्व प्रधानमन्त्री बेनजीर भुट्टोया जहान, असिफाया अबु लिसें पाकिस्तानया राष्ट्रपति जरदारीं एनए–२०७ निर्वाचन क्षेत्रपाखें पाकिस्तानया संसदीय निर्वाचनय् विजयी जूगु खः । व राष्ट्रपति जुइधुंकाः वं त्याकूगु निर्वाचन क्षेत्र खाली जूवंगु दु ।

राष्ट्रपति जरदारीं आसिफायात देसया न्हापांम्ह मिसा नियुक्त याइगु अनुमान याःगु एआरवाई न्यूजं पाकिस्तानी सरकारी स्रोतयात उदृत यासें न्ह्यथंगु दु । यदि, आसिफायात न्हापांम्ह मिसा घोषित याःसा विशेष यानाः परम्परागत रुपंराष्ट्रपतिया जहानयात बिइगु यानावयाच्वंगु न्हापांम्ह मिसाया सम्मान पाकिस्तानया इतिहासय् न्हापांगु खुसि राष्ट्रपतिया म्ह्याययात बिइगुजुइ ।

पाकिस्तानया छम्ह जक मिसा प्रधानमन्त्री जूम्ह आसिफाया मां बेनजीर भुट्टो जरदारीया सन् २००७ य् रावलपिण्डीइ जूगु आत्मघाती बम विस्फोट व आक्रमणय् हत्या जूगु खः ।

भुट्टोया किजा बिलावलं थ्वसिबें न्ह्यः अप्रिल २०२२ य् इमरान खानयात प्रधानमन्त्री पदपाखें चिइकेधुंकाः दयेकूगु पाकिस्तान डेमोक्रेटिक मुभमेन्ट (पीडीएम) सरकारय् पाकिस्तानया विदेशमन्त्रीया रुपं ज्या यायेधुंकूगु दु ।

तर, थुगुखुसि पीपीपीं शहबाज सरिफ नेतृत्वया सरकारयात पिनेपाखें समर्थन याइगु व सरकारय् सहभागी मजुइगु निर्णय याःगु दु ।

पाकिस्तान पिपुल्स पार्टी (पीपीपी) या सहअध्यक्ष आसिफ जरदारींआइतवाः पाकिस्तानया १४ क्वःगु राष्ट्रपतिया रुपं सपथ काःगु दु ।

जरदारी सेनाया प्रमुख बाहेक निक्वःगुखुसि राष्ट्र प्रमुख निर्वाचित जूम्ह छम्ह जक गैर सैनिक (नागरिक) उम्मेदवार खः । वं सन् २००८ निसें २०१३ तक पाकिस्तानया राष्ट्रपतिया जिम्मेवारी कःघाःगु खः ।

पाकिस्तानय् फेब्रुअरी ८ य् निर्वाचन जूगु खः । इमरान खानया पाकिस्तान तेहरिक–ए–इन्साफ (पीटीआई) समर्थित स्वतन्त्र उम्मेदवारं अधिकतम ९२ सिटलिसें पाकिस्तानया न्हापांगु शक्ति जूसां नं इपिं दलीय भण्डापाखें प्रतिनिधि मजूगु हुनिं पीटीआईयात तःधंगु दलया रुपं मान्यता ब्यूगु मदु । निर्वाचनय् निगूगु थासय् आपालं ७३ सिट त्याकूगु नवाज सरिफया पाकिस्तान मुस्लिम लिग–नवाज (पीएमए–एनं) संसदय् दकले तःधंगु दलया मान्यता काःगु दु व ५४ सिट त्याकूगु पाकिस्तान पिपुल्स पार्टी (पीपीपीं) निगूगु तःधंगु दलया मान्यता काःगु दु ।

निर्वाचनया इलय् इन्टरनेट बन्द, धाँधलीपूर्ण मतदान व मतदानय् समान अवसरया अभाव जूगु द्वपं पीटीआई व मेमेगु आपालं दलं बिइधुंकाः चुनावयात विवादास्पद कथंकाःगु खः ।

पीपीपी व पीएमएल–एन दथुइ पाकिस्तानय् सरकार नीस्वनेगु नितिं छुं दिंया सहलह लिपा सरकार नीस्वनेगु नितिं सहमति जूगु खः ।

Categorized in अन्तर्राष्ट्रिय