zero media family planning adv

आरोहण विम्ब

– नर्मदेश्वर प्रधान

हनेबहःम्ह एमाले नेता । भाजु ओलीं धरहरा आरोहण याःगु बुखँ ब्वने । वय्कःया धरहरा आरोहण कार्यय् वय्कःयात वय्कःया दलं नं साथ बी । माःगु अक्सिजनया नं व्यवस्था जुइ ।

बुखँ ब्वने । माउन्ट एभरेष्टया सफल आरोही तेन्जिङ्ग शेर्पा लुमनी । धरहरा अनसं माउन्ट एभरेष्टय् परिणत जुइ । पदोन्नति जुयाः धरहरा प्रतिष्ठा वृद्धि जूगु अनुभव याये ।

नेता ओलीं आकाझाकां छाय् धरहरा आरोहण यात ? सकसितं खुलदुल जुइ । स्वाभाविक । स्वास्थ्यं गथे बिल ? वय्कः धरहरा च्वकाय् गथे थ्यन जुइ ? सकसियां चिन्ताया विषय जुइ । तर थः स्वस्थ । जनमानसय् छाप त्वःतेत । जनता निश्चित जुइक धरहरा आरोहणया उद्देश्य जुयाच्वन । थज्याःगु खँ न्यने । लखौं लख दां फुकाः वासः याकाः स्वास्थ्य लाभ यानाः झाःम्ह ओली । देशया भावी प्रधानमन्त्री । जनताया नुगलय् ओलीया स्वास्थ्य कमजोर तिनि धयागु भ्रम मदयेमा । आशंका मजुइमा। थ्वहे उद्देश्य ज्वनाः धरहरा आरोहण न्ह्याइ । सफल आरोहणं वय्कःया सु–स्वास्थ्य प्रमाणित याइ । धरहरा साक्षी तइ । वय्कलं धरहरा छाप दुगु प्रमाण पत्र कयादी । जनता समक्ष थःगु स्वास्थ्य कमजोर मखु । विश्वास थनादी ।

वर्तमान प्रधानमन्त्रीया नं स्वास्थ्य समस्या मदुगु मखु । दु । क्यान्सरया विरामी । तर वय्कलं इलय् ब्यलय् 

‘जिं क्यान्सर पचे याना बी धुन’ धकाः थः स्वस्थ जूगु विश्वास जनतायात बी । अय्नं वय्कःया ख्वाःपाःचा खनी । जनता वय्कः उलि  स्वस्थ मखु ला धयाथें चिन्ता काइ । आः वय्कलं नं थःगु स्वस्थता प्रमाणित यायेत बन्जिजम्प यानाः क्यनीगु खः ला ? जनता नेतातय्गु स्वास्थ्यया बारे चिन्तित जुइमाःगु अवस्था दु देशय् । नेतात झलनाथ खनाल नं इलय् ब्यलय् उपचारार्थ विदेशय् वनाच्वनी । नेता प्रचण्डया स्वास्थ्यया हालत गथे च्वं थें ? थःगु स्वस्थता प्रमाणित यायत झलनाथ खनालं प्यारासुट जम्पिङ्ग यानाः क्यनीगु खः ला ? नेता प्रचण्डं त्रिशुली क्वब्वानाः क्यनीगु खः ला ? थौं देशया नेतातय् थःथःगु सु–स्वास्थ्यया प्रमाणीकरण यायेगु प्रतिस्पर्धां देशया साहसिक पर्यटकयात गाक्क तिबः जुइ। घरेलु राजनीतिं पर्यटकतय्त थुकिं गाक्क आकर्षित याइ ।

नेता ओलीया धरहरा आरोहणं जंगबहादुरया स्मरण याकी । जंगबहादुरं धरहरा गःगु जक मखु धरहरां तिंन्हुयाः थःगु शक्ति प्रदर्शन याःगु इतिहासय् ब्वने दइ । अथे हे त्रिशुली क्वब्वाःगु, तुंथी तिंन्हूगु घटनात नं न्यने दइ । थज्याःगु साहसी ज्यां जंगबहादुर जंगबहादुर जुइ । राजनीतिक शक्ति संचय यायेत, जनविश्वास थनेत थज्याःगु चालत माः खनि । थुकिं बुलन्द राजनैतिक अर्थ नं थ्वयेका बी यः  खनिं ।

नेता ओलीं धरहरा आरोहण याइ। थःगु पूर्ण स्वस्थता साबित यानाः क्यनी। मेखे, प्रम सुशिल कोइरालां संविधान थुबलय् दयेकेगु धकाः मिति तोके याये फइ मखु धाइ । राजनैतिक तरंग थनी । नेतृ विद्यादेवी भण्डारीं ‘संविधान दयेकेगु मिति तय यायेमाः । प्रम कोइरालाया धापू शक्तिइ च्वनाच्वनेगु दाउ खः’ द्वपं बी । आक्षेप याइ । नेता ओलीया धरहरा आरोहणं सुशिल कोइराला ग्याइ । झस्के जुइ । कांग्रेस व एमालेया दथुइ संविधान दयेकेगु मिति निश्चित यायेमाः कि म्वाः धयागु खँय् दोहरी न्ह्याइ । नेता ओली व प्रम शुशिल कोइराला निम्हं रोगी । तर निम्हं स्वास्थ्य प्रमाणित जूलिसे छम्हं मेम्हलिसे उसिचाइ । इष्र्या खनेदइ । राजनैतिक वृत्तय् थज्याःगु अनुभव याइ । धरहरा आरोहण व कुर्सि आरोहण दथुइ गनं गनं स्वापू दुगु तर्क याइपिं खनेदइ ।

खतुं विशेष नेता जक मखु नेतात फुक्क गयेगु ज्याय् पास जुइ । गयेगु क्षमता नेतातय् राजनैतिक योग्यता हे जुइ । निरंकुश जुजु महाराजापिंसं किसि, सलयात जक मखु जनतायात हे गइ । प्रम चन्द्र शम्शेरं ला दरबारय् छथासं मेथाय् वनेत मनूयात प्यपां चुइकाः सलयात थें गइगु हं । अथे हे प्रजातन्त्र वइ । नेतातय्सं गयेगु ज्या त्वःती मखु । किसि, सल मखु । लखौं लख वंगु मोटर गइ । शक्तिइ गथे यानाः वनेगु स्वाहाने गइ । अझ झ्याः गइपिं, पःखाः गइपिं नेतात नं खनेदइ । गयेगु बानी, संस्कारं यानाः थौं देशया नेतातय्त सदां गयेगु, मुद्राय् खनी । उपिं गयेगु आशनय् दइ। थन अन धयागु मदु । न्ह्याथे यानाः जूसां, न्ह्याथाय् नं गयेगु थौं नेतातय्गु कुतः जुइ । मनूतय्गु ब्वहलय्, छ्यनय् जुइ बिउ, मौका लातकि गइ । अझ मौका कयाः गइ । थौंंया महान नेतातय्सं समथल भूमि मखनेधुंकल । उमि मिखां स्वाहाने स्वाहाने जक खनी । उमिसं पलाः छीबलय् स्वाहाने गयाच्वनागु पोज क्यनी । तुति ल्ह्वना जुइ । बँय् पलाः तये थाकुयाच्वनी । मौकाय् लाःसा थौं नेतातय्सं थ्व छु व छु धाइ मखु । छुँयात खंसां किसि तायेकाः आनन्द काइ ।

थौं देशया नेतातय्सं संविधान दयेकेगु अभिनय याना जुइ । हावभाव याना क्यनी । तर संविधान निर्माणयात उमिसं स्वाहाने खंकी । गयेत स्वइ। कुर्सिइ थ्यंकेगु आरोहण तायेकी । शक्तिया शिखरय् थ्यंकेगु अवसर खंकी । संविधान दयेकेगु नाटक याइ। शक्ति गथे यानाः हड्पे यायेगु, जाल झेलय् दुनी । नेतातय्त थथे धाये मास्ते वइ ...

धरहराया च्वकायात

तिंख्यः तायेकाः

ब्वां वनेत स्वइपिं अय् नेतात

ब्वां वनाः ला स्व ....

अले छिमिसं सी

छिपिं ब्वां वनाः

छिपिं न्ह्याः वनी ला कि

कुहां वनी .... ?