अर्जुन महर्जन “नेपाःमि” किपू

कविया सुन्दर कविता खः छ
न्ह्याक्व ब्वंसां नं पूमवंगु थेँ
यथार्थया हिसि दुम्ह नकिं खः
छ न्ह्याक्व स्वःसां नं लुमधंगु थें ।

मतिनाया सागर क्वबिइ फुम्ह खः छ
न्ह्याक्व त्वंसां नं प्याःचाः मलंगु थें
खुसिया त्वाःमदःगु गति खः छ
गुकिइ न्ह्यानाः नं अतृप्तगु थें ।

सिचुगु फय्या ह्वःताः खः छ
ताल्लाया बेलासं नं वेगः मतंगु थें
महिमा गुलि ल्हायेगु प्रिय खः छ
आराधना न्ह्याक्व याःसां मगाःगु थें ।