coved ad

आर.आर. क्याम्पसय् एम.ए. नेपालभाषा ब्वंकेगु पलाः न्ह्यात

नेवा: अनलाइन न्युज – ललेन्द्र शाक्य | २०७८ मङ्सिर २१, मंगलबार १५:१०:१२

येँया प्रर्दशनी मार्गय् च्वंगु रत्नराज्यलक्ष्मी (आर.आर.) क्याम्पसय् वंगु शुक्रबार सभाहललय् जूगु  ओरेन्टेशन ज्याझ्वःया घोषणा लिपा आइतवाःनिसें विधिवत् रुपं स्नातकोत्तर (एम.ए.) तहया नेपालभाषा कक्षा न्ह्याःगु दु ।

शुक्रवाः जूगु ज्याझ्वलय् मूपाहाँ झायादीम्ह येँ महानगरपालिकाया मेयर विद्यासुन्दर शाक्यं देसय् दुगु दुक्व भाय्, संस्कृतिया संरक्षण सम्बद्र्धन यायेगु प्रदेश सरकार, स्थानीय सरकार व  राज्यया हे दायित्व व कर्तव्य जूगुलिं महानगरपालिकाया कार्यपालिकाया बैठकपाखें न्यादँया नितिं सम्झौता यायेधुंकूगुलिं थप हाकनं ग्वाहालि यायेगु बचं प्वंकादिल । नेपालभाषा ब्वंकेगु नितिं येँ महानगरपालिका आर.आर. क्याम्पसलिसे १५ लख तका दांया सम्झौता याःगु खः । एम.ए. कक्षा न्ह्याकेगु नितिं न्यादँतक दँय् दसं क्याम्पसयात १५ लख तका दां लःल्हायेगु सम्झौता जूगु खः ।

विशेष पाहाँ कथं उपस्थित जुयादीम्ह त्रि.वि.या डिन प्रा.डा कुसुम शाक्यं नेपालभाषां भाय् लिसें साहित्य, संस्कृति, धर्म सयेकेगु नं ज्या याइगुलिं नेपालभाषा अथाह ज्ञानया भण्डारं जाःगु हुनिं सकल ब्वनामिपिन्सं थःगु दायित्व पालना ल्वःममंकुसे अध्ययन यायेगु भाला पूवंकेत पूवंक प्यक्वःगु सेमेष्टरतक  कक्षा कयाः आखः ब्वनादिइत इनाप यासे भिंतुना देछानादिल ।

लिसें नेवाः विद्यार्थी युनियनया मूछयाञ्जे प्रशान्त डंगोलं नेपालभाषाया संरक्षण सम्बद्र्धन यायेत न्हूगु योजना लिसें विश्वविद्यालय दयेकेगु बृहत योजना ज्वनाः रिदेन महर्जन, रितेश मल्ल, इन्द्रमान महर्जन, महेश्वर श्रेष्ठ, राजेश श्रेष्ठ, सुरोज तण्डुकार लगायतया अभियन्ता पासापिंलिसें जानाः न्ह्यचिलाच्वनागु जुया फुक्कसिगु भलसा व तिबः दैगु विचाः प्वंकादिल ।

उगु क्याम्पसया स्ववियूया नायो टपेन्द्रजंग शाहीं नेपालभाषाया वइगु दिनसं  क्याम्पस प्रशासनं ग्वाहालि याइगु बचं प्वंकूसे नेपालभाषाय् ह्वःताःलिसें हाथ्या नितां दुगुलिं आःया पिढिपिन्त स्वनिगलय् च्वनादिइपिन्त एकेडेमिक क्षेत्रय् म्हसिइकेत ब्वनामि पासापिनिगु मूवंगु भूमिका दइ धकाः नुगः खँ प्वंकादिल ।

ज्याझ्वःया सभानायः डा. जीवनधर ज्ञवालीं नेपालभाषा एम.ए. अभियान पूर्ण रूपय् ताःलाकेत जिमिगु रत्नराज्यलक्ष्मी क्याम्पसया नेपालभाषा शिक्षक प्रा.डा. चन्द्रमान बज्रार्चायलिसें सकल ब्वनामिपिनिगु मूवंगु भूमिका दु धकाः नुगःखँ प्वंकादिल ।

Categorized in नेवाः