ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

आपालं कलाकार व सेलिब्रिटी दुथ्याका ‘नेपाःमि झी’ म्येया म्यूजिक भिडियो पिदनीगु

नेवा: अनलाइन न्युज – विजयरत्न | २०७८ श्रावण ६, बुधबार १३:५१:०७

नेपालभाषा संगीत ख्यलय् थौंकन्हे आपालं न्हून्हूगु म्ये पिदना च्वंगु दु । अथे पिहाँ वःगु म्येया म्युजिक भिडियो दयेके ज्या नं  उतिकं हे जुयाच्वंगु दु । थ्वहे झ्वलय् नांजाःम्ह साहित्यकार  महेशमान लँजुवा भाजुं च्वयादीगु छपू न्हुगु म्ये  पिदने त्यंगु दु ।  

स्रजल महर्जन , आशिष डंगोल, यजु सिल्पकार व कुन्जनि महर्जनया सलय् रेकर्ड जुउगु नेवाः राष्ट्र भावं जाःगु ‘नेपाःमि झी’ म्येया रेकर्डिङ ज्या क्वचाये धुंकुगु दु । 

नांजाम्ह संगीतकार नील शाक्यं लसय् हनादीगु थ्व म्येया मिक्सिङ्ग व रेकर्डिष्ट फिरोज बज्राचार्य, एरेन्जर भुपेन्द्र बज्राचार्यं यानादीगु खः ।

थ्व म्येया याकनं हे म्युजिक भिडियो निर्माणया ज्या न्हयाये त्यंगु दु । म्युजिक भिडियो दयेकेया निंतिं थ्व ख्यलय् नांजाःम्ह निर्देशक रामकृष्ण खडगीयात भाला बिइधुंकुगु दु । 

थुगु म्यूजिक भिडियोय् नेवाः ख्यलय् नांजाःपिं थीथी ख्यःया सेलिब्रिटीया नापनापं आपालं नेवाः कलाकारतयत नं अभिनय याकेगु ग्वसाः जुयाच्वंगु खँ थ्व म्येया संगीतकार नील शाक्यं कनादिल । 

लुमंकेबहःजु, नेपालभाषाया दकले न्हापांगु म्युजिक भिडियो नं संगीतकःमि शाक्यया ‘लुमंका च्वना छन्त जिं’ म्येया म्युजिक भिडियो खः ।

Categorized in कला