नेवा: अनलाइन न्युज | २०८० भाद्र ३१, आइतबार १५:२२:२७

चिकित्सकयात कुटपिटया विरोधय् देय् न्यंकंया चिकित्सकपिन्सं आकस्मिक बाहेकया सेवा ठप्प यायेधुंकाः सरकारलिसे वार्ता जूगु दु ।

स्वास्थ्य व जनसंख्या मन्त्रालयं नीस्वंगु न्याम्ह दुजःया वार्ता पुचलं आन्दोलनरत नेपाल चिकित्सक संघया प्रतिनिधिलिसे वार्ता याःगु खः ।

अतिरिक्त स्वास्थ्य सचिव डा. विकास देवकोटाया संयोजकत्वय् नीस्वंगु सरकारी वार्ता पुचलय् प्रधानमन्त्री व मन्त्रिपरिषदया ज्याकुथि, गृहमन्त्रालय, कानून न्याय व संसदीय मामिला मन्त्रालय व स्वास्थ्य व जनसंख्या मन्त्रालयया सहसचिवपिं च्वंगु दु ।

स्वास्थ्य मन्त्रालयस आइतवाः न्हिनय् निता ईनिसें वार्ता न्ह्याःगु खः । भाद्र २७ गते हेटौंडाया सञ्चो अस्पतालया डा. विकास थापा व डा. प्रशान्त बिडारीयात अस्पतालय् विरामीया वासः यायेगुलि खटेजुयाच्वंगु इलय् हे कुटपिट जूगु खः ।

नेपाल चिकित्सक संघं डाक्टरयात आक्रमण याःपिन्त कानूनी कारवाहीया प्रक्रिया न्ह्यःने यंकेत दबाब बिसें आइतवाःनिसें देय् न्यंकंया अस्पतालया आकस्किम बाहेकया फुक्क सेवा ठप्प याःगु खः । गुकिया हुनिं अस्पतालय् थ्यंकूपिं विरामीया वासः मयाःसे छेँय् लिहाँ वनेत बाध्य जूगु दु ।

Categorized in राजनीति