prabhu baink new

आन्तरिक वायुसेवाय् फुक्क सिटय् यात्रु तयेदइगु, भाडा थाहाँ मवनीगु

नेवा: अनलाइन न्युज – ललेन्द्र शाक्य | २०७७ आश्विन ४, आइतबार १२:०१:१२

आन्तरिक वायुसेवा कम्पनीतसें फुक्क सिटय् यात्रु तयाः उडान यायेफइगु जूगु दु ।

संस्कृति, पर्यटन व नागरिक उड्डयन मन्त्रालयं फुक्क वायुसेवा कम्पनीयात पौ छ्वयाः कन्हय् असोज ५ गते सोमवाःनिसें नियमित आन्तरिक उडान सुरु जुइगु जानकारी ब्यूगु दु । तर, उगु पौ दुने यात्रु च्वनीगु सिट ल्याःया बिषयस छुं न्ह्यथनातःगु मदु ।

मन्त्रालयया कथं वायुसेवा कम्पनीतसें यात्रुपिन्त भौतिक दूरी कायम यानाः सुरक्षा सतर्कता छ्यलाः आन्तरिक वायुसेवा कम्पनीतसें उडान यायेफइगु जूगु दु ।

थ्वसिबें न्ह्यः सरकारं सिटय् ५० प्रतिशत जक यात्र तयेके बिइगु धायेधुंकाः वायुसेवा कम्पनीं उडान यायेमफइगु धाःगु खः ।

तर, पर्यटन मन्त्रालयं उकी सहजीकरण याःगु खः । मन्त्रालयया कथं पूर्व निर्धारित सुरक्षा सतकर्ताया विधि धाःसा फुक्क एइरलाइन्सं छ्यलेमालीगु जूगु दु ।

९ न्हुतक २५ प्रतिशत जक उडान

२१ सेप्टेम्बरनिसें ९ न्हु (३० सेप्टेम्बर २०२०) तक धाःसा साविकया जुइगु आन्तरिक उडानया तुलनाय् जक २५ प्रतिशत उडान जुइगु जूगु दु । तर, उडान धाःसा फुक्क विमानस्थलय् जुइ ।

वायुसेवा संस्थां लकडाउन न्ह्यः काःगु बजार हिस्साया आधारय् २५ प्रतिशत उडान जुइगु कथं तालिका तय याःगु दु ।

अक्टोबर १ निसें धाःसा यात्रुया उपलब्धता व वायुसेवा कम्पनीया माग कथं थप उडानत स्वीकृत जुइगु मन्त्रालयं जानकारी ब्यूगु दु ।

माग व औचित्यता स्वयाः थप उडान स्वीकृत यायेगु मन्त्रालयं वायुसेवा कम्पनीयात जानकारी ब्यूगु दु ।

भाडा थाहाँ मवनीगु

हवाई यात्रा यायेबलय् तत्काल भाडा धाःसा थाहाँ मवनीगु जूगु दु । सरकारं भाडा थकयाः ५० प्रतिशत जक सिटय् यात्रु कुबिइत वायुसेवा कम्पनीयात प्रस्ताव याःगु खः ।

तर, वायुसेवा कम्पनीं धाःसा भाडा थमकायेगु तर पूर्ण क्षमताय् यात्रु कुबिइ दयेमाःगु अडान तःगु खः । वहे कथं साविकया तुलनाय् हवाई भाडा अप्वः मजुइगु वायुसेवा संचालक संघया दुजः प्रज्ज्वल थापां जानकारी ब्यूगु दु ।

हेल्थ डिक्लिरेशन यायेमाःगु

आः आन्तरिक हवाई यात्राया नितिं यात्रुं बोर्डिंग पास कायेन्ह्यः हेल्थ डिक्लिरेशन फारम जायेकेमालीगु जूगु दु । थुज्वःगु फाराम सम्बन्धित वायुसेवा संस्थायात लःल्हायेमालीगु जूगु दु ।

यात्राया झ्वलय् फुक्क यात्रुं मास्क अनिवार्य तयमालीगु जूगु दु ।

Categorized in राष्ट्रिय