zero media family planning adv

आकार कायेमफूगु किपाः

- रेखा शाक्य

शहीद गेटय् टेम्पो पिया च्वनागु नं आः मखये धुंकल । म्वःम्वः मनूत गथांमुग थें थिंग दना च्वंगु दु । दक्वसियां थःथगु छेँ थ्यंके हथाय् मखा जुइ । जि नं तुति स्याःगु उलि थुलि हे मदये धुंकल । टेम्पो ला मवःगु मखु तर जिं मालागु गन्तव्यया मखुत का । हल हल फसिक्वाः धयाथें सितापाइला धकाः च्वया तःगु जक टेम्पो हया येँयाः बलय् झ्यालिंचां लाखेयात हायेक वये थें जिगु न्ह्यःने वयाः दिके हयाच्वन । 

इलचं छकः स्वयाः । खुता त्या ला जुइ हे धुंकल । छु याये, छु याये जुल । बसय् च्वना सां छें थ्यंकः वने ला धयागु मतिइ लुल । कालीमाटी तक वनां छुयाये हानं अपाय्हाकः न्यासिवना छेँ वनेमानिगु लुमना वल । म्वाय्से पलख पियां छु हे जुइ गन हे वने माःगु दु धकाः जि नं धेता जुया हे इरुथिरु जुया टेम्पो पियाच्वना ।  द्यः झन झन ख्युँख्युँ धाया वल । लिक्क मेम्ह मिसा छम्ह नं पंखा चाह्यु थें थःगु छ्यं उखेंथुखें चाहुका च्वन । जिं तीजक न्यना ... छि नं टेम्पो पियाच्वना दीयागु ला ? वं जितः छकः पुलुक्क स्वल अले खः धकाः छ्यं क्वात । गुगु रुटया थें धकाः जिं खँ छुना । गाइबाच्छापाटी धकाः धायेवं जिं हान न्यना गुलि बजे तक टेम्पो दइ थें हला ? लिबाये धुंकल । “न्हयता ई तक ला दइ”  वयागु खँ न्यना नुगः भचा थहाँ वल । मखुसा ला जि व रुटया टेम्पो पिइ हे मनं व नं अबायति ला  ।

मोबाइलया घण्टीं व नापया खँल्हाबल्हा त्वाःदल । उखें पासाया सः थ्वल “गन छेँय् खःला ?” जिं थः छेँय वनेत टेम्पो पियाच्वनागु खँ कना । जि नाप ज्याखँया छता निता खँ ल्हानाः, “का सा बुलुँहुँ हुँ” न्हि धकाः फोन दिका हल । न्हापा लिपा जूसा जि गनं लँय् धालकि हे धाः “आः छ गनं दु जि तुरुन्त हे वये”े धाइगु, अले ब्वया वइम्ह झंग थें हे इपां थिपां मदयेक जितः नापलाकः वइ । थज्यागु गुहाली छकः निकः जक हे मखु यक्व हे याः । जि भतिचा अजू चाल वयागु थौंया पहः खनाः । उफ, थ्व मनूत नं उकिसनं मिजंपिं पासापिं नं तसकं हे पाना वनेयः खनिका इहिपा धुनेवं धकाः मतिइ वल । न्हापा लिपा जूसा जि छेँय् मथ्यंनि धाल कि हे “जि नं लँय् हे खः गन थ्यन ले जिं का वये का” धकाः धाइगु का । आ स्वः ...... छकः का वये ला धाइ धकाः नकतिनि हे अफिसं छेँ लिहाँ वयागु धाइगु का । उबलय् हे छगः टेम्पो हःगु खना । धन्य जिं पिया च्वनागु रुटया हे लात जि काचाकिचां टेम्पोय् च्वनेत स्वया । दुने ला सिट दक्वं जाया च्वने धुंकल खनि । अय्नं दना सां वनेमालि धकाः व मिसा व  जि निम्ह टेम्पोय् च्वना । थाय् ला दुगु हे मखु, उकिसनं धुसि लुयाः दना च्वनेमाःगु । टेम्पो न्ह्यात थःगु रफ्ताय् । अले जि न्हयाना जिगु अतितया धकिं चायेका । 

राहुल, खः वयागु नां वं जित थ्व हे धाःगु, न्हापांगु खँल्हाबल्हा जूगु इलय् । स्कूलया, क्याम्पसया वा छुं न खलः पुचःया पासा मखु व जिगु । वयात नापलाःगु ला फोनय् अले पासा जूगु नं ब्लफकलपाखें । लुमंलुमं अजू चाइगु जि उबलय् । छकः निकःया फोनया खँल्हाबल्हां जिमिगु दथुइ पासाया पुसा तयेत सफल जुल । जिपिं निम्ह साप हे मिले जूपिं पासापिं थें छन्हु जक फोनय् खँ मल्हायेवं नं जिमित छुं छुं त्वः फिउगु थें जुइगु । वं जितः थःगु न्ह्यागुं खँ कनेगु याना हल । ज्याया बारे छेँया बारे .........गनं जक वंसां जितः कनाः वनेगु याइगु । जि लय्ताः वया उज्वःगु बानी खनाः ।  न्हापा लिपा थें छन्हु वया छेँय् वनागु, जि वःगु खनाः वया तताजुम्ह नं वयाः खँ ल्हाःवल । छुं उखेंथुखेंया खँ ल्हाना च्वनाबलय् राहुलया मां नं वयाः सुम्क फ्यतुत । भतिचा जायेकाः मांम्हं जितः स्वयाः धाल .....नानी छ आवंलि बाबुयात नापलाः वयेमते, ब्याहा याये मानीम्ह जिमि पुतायात थथे मिसा मचा छेँय् वयाः नापलाःगु खन कि जःलाखःलां छु धाइ ? सुनां थः म्ह्याय्मचा बिइमखु । हानं नानीया फोन छकः वलकि हे जा नःगु दिनाः हे तुरुन्त पिहाँ वनीगु । जितः ला मयः थथे नापलाना जुइगु । मांया खँ न्यनाः जि ला छु याये छु धाये का । मतिइ हे मवंगु खँ अथे छक्वलं जितः वया तताजुया न्ह्यःने धाःगु खनाः म्ह छम्हं क्वाःलखं लूगु थें पुत । जिं नं जिपिं निम्ह पासा जक हे खः धकाः मांयात खँ थुइके थें धया । मांम्ह मेगु नं छु छु धया दुनियाँदारीया खँ जित न्यंकाच्वन जितः धाःसा अन पलख च्वने नं सिना थें मछाला वल । जि सुम्क वने न्हि धया इमिगु लिसः हे पिया मच्वंसे थःगु छेँपाखे स्वया पलाः न्हयाका । लँ दुच्छि मांम्हेसिगु बचं जिगु न्हाय्पने थ्वया च्वन । मिखाय् ख्वबि लँयलँय् पुयावल । राहुल खना नं तं पिहाँ वल उलि मछिं मांम्हं धालं नं वं छसः हे थः मांयात छुं मधाः ।  

निन्हु प्यन्हु तक फोनय् खँल्हायेगु क्रम दित । लिपा राहुलं हे फोन याना हल । वया मांम्हं धाःगु खँया लिसलय् छाय् म्हुतुइ धौ फिना सुम्क च्वनागु धकाः न्यनां “मांपिं धयागु न्ह्याम्हेसियां अथे हे ला खःनि जितः ब्याहाया धकाः धयाच्वंगु जिं आः म्हाः नि धकाः धया च्वगुनालिं गनं छं याना जकं खः ला धकाः मां नं उखुन्हु................”.धकाः म्हुतुइ जायेक वःगु खै मल्ह्वसे घुतुक्क घुतका छवत........ खँ पूमवंकु । जिं नं म्वाःल का अथेसा छिमि मांयात अज्यागु सुर्ता जुइक छाये जि नाप ............पासाया स्वापु हे त्वःफिका छ्वःसां जि हे जिउ नि, जिं धया । वं जितः थपाय् हाकः ज्ञान बिइ थें खँ कनाः जितः हयेकाच्वन अले न्ह्याम्हेसिन न्ह्यागु धाःसां छंगु जिगु पासा स्वापुतिइ गनं नं गबलें नं भूबाइ मखु, छ जितः तसकं यःम्ह पासा खः जिगु व्यवहारय् गबलें नं हिउपा वइमखु धकाः बचं हे बिल । वयागु खँ न्यनाः म्वाःल छु रबर थें सात्तुसाला खँ ताहाकः याये धकाः सकतां खँयात ध्याकुने वांछ्वयाबिया । हाकनं न्हापा लिपा थें हे जिमि दथुइ फोनय् खँ ल्हायेगुया नापनापं नापलायेगु नं जुयांतुं च्वन । 

छन्हु राहुलयात अफिसं लिहां व वं फोन यानाः नापलायेत धया । वयागु अफिसया ज्यां व महाराजगंजय् धाल । अय्सा म्वाःल का धयाः जि सुम्क तुं छेँय् लिहाँ वया । थ्व क्रम आः छकः निकः जुजुं तःक्वः हे जुल । जिं गबलें नं नापलायेत धाये वं गबलें छु गबलें छु त्वहः तयेगु याना हल । न्हापा लिपा जूसा जिं फोन यायेमा मयाये मा वं हे “छ गन ? थौं नाप लायेगु मखुला” धकाः फोन यानाहइगु । जिं वयाके जि प्रति वया च्वंगु ह्युपाःयात मखं पहः यायेत स्वयां नं वयागु व्यवहारं जिगु बिचाःयात हिलेमफुत । छन्हु अफिसं लिहाँ वया च्वनागु इलय् वंगलय् ध्वदुक्क नापलात जिपिं निम्ह अजू चाल बिचाः मयाना, जिं वयात थबायति उगु थासय् नाप लाइ धकाः न त वं हे बिचाः याःगु खइ । जिं धया “अहो छ ला थौंकन्हय् साप हे मला खनिसा अपाय्सकं ध्यबा कमय् याना गन तयेगु ?” जिगु खँ न्यना राहुल मुसुक्क न्हिल । जिं हाकनं धया,  “का आः नापलाबलय् नु च्या छगू कप त्वनाः खँ ल्हाये, थौं कन्हे ला जितः नाप लायेमालि धकाः साप हे ग्याःथें च्वं नि ।” जिगु ध्याचुलिं जाःगु खँ न्यना मछिं पहलं धाल, “अथे मखु ज्या हे अज्यागु जुयाच्वन .........नाप लायेगु गन वनि ?” “नाप लायेगु ला गनं वनिमखु तर नाप लाइम्हेसिया मन हे मदुसा थ्व जुनी जक मखु न्हय्गु जन्म काःसां नापलाइ मखु नि, छं स्यू कि मस्यू ?  जिं वयात धया । छुं लिसः मब्यू जितः छकः स्वल हानं मिखा उखेंथुखें चाःहुइका च्वन । वया म्हायेक म्हायेक हे जितः थःगु मोटरसाइकलया ल्यूने तयेमाःगु जि बांलाक वाः चाः । निम्ह मरु थ्यंका गनेद्यःया लिउने च्वंगु होटलया मेचय् फ्यतुनाः च्या छगू छगू कप अर्डर याना । छगू निगू अफिसया खँ ल्हाये धुंकाः जिं हे खँ छुना,  “छाय् ? थौंकन्हय् ला जितः साप हे मखं पहःयात नि छं ला ? उखुन्हु छिमि मामं धाःगुया असर छंत नं जुल कि छु ? मांया खँ न्यना सुम्क ब्याः यानाः छ्वःसा ला जि हे जिउ नि वयागु खँ ल्ह्वकेत जिं थुलि धायेवं वयात खँ ल्हायेगु लँपु चाल थें वं धाल, “खः आः वइगु माघं हे जिगु इहिपा जुइगु जुल । न्हापा ला जि पत्याः मजूया, लिपा उखुनु छं फोन याना हःगु दिं खुन्हु हे जि म्ह स्वः वनागु, खँ पक्का जुल । वयागु थ्व खँ न्यना छझाः जि द्यः हे जुल, “अय् ......थ्व ला बांलागु लसतां जाःगु खँ हे खःनि अले जितः नं जन्ती यंकेगु मखुला ले ?”   वं जित खुब आँट याना थुलि धाल,  “मखु छन्त यंकेमखु,  जिमि पासापिन्सं छ जिगु तसकं मिलेजूम्ह पासा धकाः स्यू उमिसं ला छ हे जिमि...........उकिं ........।” वं मेगु छुं मधाः..........मौन च्वना नं वं सकता खँ कन थःगु ख्वालं .....जिं छु धायेमफुत  । बागु कप च्या वयागु खँ न्यँन्यं ल्यना च्वंगु जितः त्वने थें मजुल । व बागु कप ख्वाँउगु च्या व लँपु दथुइ थ्यंगु जिमिगु पासा स्वापु यात जिं क्वथीक स्वया । अले तीजक लिक्कसं च्वंगु बाय्गं ध्यबा पिकया पसल्या साहुयात पुला । जि न्ह्यःने व जिगु ल्यू ल्यू....नुगलय् खँ कापू स्वःथें स्वयाच्वन ।

न्ह्यःने गाः दूगु छतिं मखं थुनाचुइक भ्वसुल ........सकलें अय्......का... का....  छु जूगु धकाः चिल्लाय् दनाः हाल जि जिगु अतितं झसंग वन......जिगु छेँया लँपु ताहाचःया लँय् थःगु हे मतापय् न्ह्याना च्वंगु व टेम्पो ला सतकय् म्हुयातःगु गालय् लाना छखें धेचुगुलिं हाःगु खनि । सकलें टेम्पों कुहाँ वया धेचूगु टेम्पोयात मेपिनिगु गुहाली कया धस्वाकल । जि छें थ्यने हे त्यंगुलिं हानं मच्वंसे ध्यबा पुलाः टेम्पो ड्राइभरयात बुलुँहुँ झासँ न्हि धकाः धयाः पलखः अन हे दिनाः ताहाकय्क झसुका छकः तया ।  टेम्पो न्ह्यात । हानं थःगु हे रफ्तारय् । जिं व न्ह्यानाच्वंगु टेम्पोयात मिखां खनेदत्तले स्वया हे च्वना । दुवाः वल, टेम्पों थःगु लँपु हिला वन, पलखं जिगु मिखां तापाना वन । जीवनय् सु गन नाप लाइ गन त्वःफिइ थुकिया छुं थाःगा मदु लँपु व लँजुवा दत्तले थ्व क्रम नं थथे हे जुइगु ला जुइ नि धैगु मतिइ तयाः जि थःगु छेँपाखे पलाः न्ह्याका ।