kmc bidya

आइ. एल. ओ. १६९ तालिम क्वचाल

नेवा: अनलाइन न्युज – ललेन्द्र शाक्य | २०७६ पौष २९, मंगलबार १६:३१:१६

आदिवासी जनजातिया हक, अधिकार लिसेलिसें सांस्कृतिक पहिचान विषयस आइ. एल. ओ. १६९ तालिम येँया ताम्सिपाखाय् आइतवाः जूगु खः ।

नेवाःतय्गु राष्ट्रिय संगठन नेवाः देय् दबूया ग्वाहालि व समग्र नेवाः ब्वनामिपिनिगु संगठन नेवाः विद्यार्थी युनियनया ग्वसालय् उगु तालिम न्हापांगु खुसि जूगु खः ।

उगु तालिम मिडिया रिसर्चर लिसें पत्रकार मिरा राजभण्डारीं क्लास कयादीगु उगु तालिम निघौतक न्ह्याःगु खः ।

नेवाः देय् दबूया ताम्सिपाखाया च्वंगु भवनय् जूगु तालिमय् रत्न राज्य लक्ष्मी क्याम्पसया बि.ए. न्हापांगु दं, बि.ए. निगूगु व स्वंगूगु दँया ब्वनामिपिं यानाः मुक्कं ११ म्हेसिन ब्वति कयादीगु खः ।

तालिमय् ब्वति कयादीम्ह बि.ए. न्हापांगु दँय् नेपाल भासा विषय कयाः ब्वनादीम्ह विवेक श्रेष्ठ व मनहेरा महर्जनं थुज्वःगु तालिम अतिकं आवश्यक जूगु खः विचाः प्वंकादीगु दु ।

वय्कःपिन्सं थुज्वःगु तालिमं छखे सचेतना थनेगु ज्या याइगु लिसेलिसें आदिवासी जनजाति नापनापं नेवाः अस्तित्व व अधिकार लगायत आपालं जानकारी कायेखंगु धासें थंपिं नं मां भाय् मसयाः हे रत्न राज्यलक्ष्मी क्याम्पसय् नेपालभाषा विषय ब्वनागु जानकारी बियादिल ।

युनियनया नायः रीदेन महर्जनं वइगु दिनसं थुज्वःगु हे सचेतनात्मक, रोजगारमूलक, सीपमूलक लिसें थीथी तालिम बिइगु जानकारी बियादीगु दु ।

Categorized in नेवाः