kmc bidya

आइतवाःनिसें बैंकया फुक्क शाखा खुल्ला जुइगु

नेवा: अनलाइन न्युज – ललेन्द्र शाक्य | २०७७ बैशाख २६, शुक्रबार २०:२८:४१

आइतवाःनिसें बैंकया फुक्क शाखा ज्याकुथित खुल्ला जुइगु जूगु दु । सरकारं लकडाउनया हे दथुइ उद्योगत खुल्ला याइगु जुइधुंकाः बैंकतसें नं फुक्क शाखा ज्याकुथि चायेकाः सेवा बिइगु जूगु दु ।

थ्वसिबें न्ह्यः बैंकतसें आंशिक रुपं जक सेवा बियाः वयाच्वंगु खः । छन्हु बानेश्वरया शाखा सा मेगु दिं कोटेश्वर, मेगु दिं मेगु थासय् च्वंगु शाखा ज्याकुथि चायेकाः सेवा बियाः वयाच्वंगु बैंकतसें आः धाःसा फुक्क थासय् च्वंगु शाखात चायेकीगु बैंकर्स संघया नायः भुवन दाहालं जानकारी ब्यूगु दु ।

दाहालया कथं बैंकया फुक्क शाखा चायेकेत फुक्क बैंकयात इनाप यायेधुंकूगु दु । छुं अतिकं समस्याय् लाःगु शाखात बाहेक मेमेगु खुल्ला जुइगु नायः दाहालं धाःगु दु ।

मन्त्रिपरिषद बैठकं बैंक व वित्तीय संस्था, विमा, धितोपत्र, सहकारीपाखें अति आवश्यक सेवा प्रवाह यायेमाःगु ज्याया नितिं माःपिं कर्मचारीमध्ये छगू तिहाइ कर्मचारीपाखें सेवा संचालन यायेगु धकाः निर्णय जूगु खः ।

सरकारी निर्णय कथं हे छगू तिहाइ कर्मचारी तयाः सेवा सुचारु यायेगु नायः दाहालं धाःगु दु । शाखा ज्याकुथित खुल्ला जूसां नं सुरक्षाया आवश्यक सावधानीत धाःसा छ्यलीगु दाहालं धाःगु दु । दाहालया कथं पालंपाः शाखा ज्याकुथि दुने न्याम्हसिबें अप्वः सेवाग्राही दुहाँ वये मदइगु ब्यवस्था याइगु जूगु दु ।

माक्स व स्यानिटाइजर तकं कर्मचारी व फुक्क सेवाग्राहीया नितिं अनिवार्य यायेगु नायः दाहालं धाःगु दु । नायः दाहालं धाःगु दु, “आइतवाः अपवाद बाहेकया फुक्क शाखात ज्याकुथि चायेकाः सेवा बिइगु जुइ । तर, उच्च सुरक्षा सतर्कता छ्यलेमालीगु जुइ ।”

Categorized in बजाः