prabhu baink new

आः मनूया नुगःखँ कम्प्युटरं ब्वनी !

२०७४ चैत्र २९, बिहिबार १६:३१:१३

वैज्ञानिकपिन्सं छगः थुज्वःगु कम्प्युटर तयार यानाच्वंगु दु, गुगु कम्प्युटरं मनूया नुगःया खँ ब्वनीगु याइ । छिं न्वःमवाःगु व नुगलय् तःगु लिसे सोचेयाःगु खँ उगु कम्प्युटरं न्यने फइ ।

अमेरिकाया म्यासाचुसेट्स इन्स्टिच्यूट अफ टेक्नोलोजीया शोधकर्तापिन्सं आर्टिफिसियल इन्टेलिजेन्सया आधारय् छगः थुज्वःगु कम्प्युटर इन्टरफेस दयेकूगु दु गुकिं मनूया ख्वाः ब्वंगुया भरय् हे मनूया नुगलं सोचेयाःगु खँ फटाफट धयाबी ।

उगु कम्प्युटर प्रणालीइ दूगु विशेष प्रविधिं मनूया ख्वाःया भाव व नुगलय् म्हितकातःगु खँग्वःतय्गु प्रतिक्रिया थुइकाः मनुखं न्वःमवाःगु खँग्वःत तकं उगु कम्प्युरटरं तुरुन्त हे धयाबी ।

उगु डिभाइसं गुकथं ज्या याइ ले ?

उगु विशेष डिभाइसया विषयस खँ ल्हासें उकिया निर्मातापिन्सं धाःगु दु कि उगु कम्प्युटरय् तयातःगु इलेक्ट्रोडं मनूया ख्वाः व वाधीपाखें प्राप्त जुइगु न्युरोमस्कुलर संकेतया माध्यमपाखें नुगःया न्वःवाःगु खँग्वःयात ब्वनेफइ व उकियात पितहयाबी ।

वैज्ञानिकपिनिगु कथं नुगलय् सोचेयाःगु खँग्वःयात न्वःमवाःसे उच्चारण यायेगु नितिं मनुखं थःगु वाधी दुने चाल उत्पन्न याःगु जुइ । वहे चालपाखें उत्पन्न संकेतयात उगु कम्प्युटर प्रणालीं पहिचान याइ, गुगु मेम्ह मनूया मिखां सीमखु ।

उगु कम्प्युरटर सिस्टय् छगू ‘पहिरिनेवाला’ डिभाइस नं दइ । गुकिया माध्यमपाखें खँग्वःया संकेत मेसिन लर्निङ सिस्टमय् प्राप्त जुइ । उगु प्रणालीयात खँग्वःलिसें विशेष संकेतनाप थःथवय् स्वायेगु नितिं प्रशिक्षित जुइ ।

इन्स्टिच्यूटया मिडिया ल्याबया अधिकारीपिनिगु कथं इपिं उत्कृष्ट इन्टेलिजेन्स अमेन्टेसन डिभाइस दयेके चाहेजू ।

थ्व थुज्वःगु कम्प्युटिङ प्लाटफर्म जुइ, गुकिं मनूया नुगःया गहिराइतक थ्यंके फइ । थ्व थुलि लिक्क जुइ कि मानव नुगः व मेसिन छप्प जुयाः छम्ह जुइ अले मानवीय अनुभूतियात लिक्कं अनुभव याइ ।

शोधकर्तापिनिगु कथं आःतक वःगु परिणाम अतिकं उत्साहवर्धक जूगु दु व लिच्वः अतिकं उत्कृष्ट जूगु दु ।

भविष्यय् मनूया नुगःया खँल्हाबल्हायात मुक्कं ब्वनेफइगु कम्प्युटर तयार यायेगु आज्जुइ सफलता प्राप्त जुइगु विश्वास इमिसं काःगु दु ।

–एजेन्सी