नेवा: अनलाइन न्युज | २०८० भाद्र १८, सोमबार ११:२१:३३

यदि छि नं फेसबुक व इन्स्टाग्राम छ्यलाबुला यानादियासा छिगु नितिं अतिकं महत्वं जाःगु खबर दु ।

मेटा कम्पनीं थःगु निगू तःधंगु सोसल मिडिया प्लाटफर्म फेसबुक व इन्स्टाग्रामयात सःशुल्क यायेगु निर्णय याःगु दु । अर्थात् फेसबुक व इन्स्टाग्राम चलेयायेगु नितिं छिसं दां खर्च यायेमालीगु जूगु दु ।

रिपोर्ट कथं मेटां तत्कालया नितिं युरोपय् थुज्वःगु सःशुल्क सेवाया सुरुवात यायेगु निर्णय याःगु खः ।

युरोपेली युनियनया पाखें विज्ञापन व प्राइभेसीयात कयाः मदिक्क दबाब अप्वयाः वयाच्वंगु इलय् मेटां थःपिनिगु सेवा बापत शुल्क कायेगु निर्णय याःगु दु ।

मेटाया योजना कथं युरोपेली युनियन सम्बद्ध देसया सुं नं प्रयोगकर्ताया नितिं फेसबुक व इन्स्टाग्राममध्ये छगूया नितिं शुल्क पुलीबलय् मेगु प्लाटफर्म निःशुल्क चलेयायेखनीगु व्यवस्था याइगु जूगु दु ।

लिसें सःशुल्क सेवा काइपिनिगु नितिं फेसबुक व इन्स्टाग्रामय् विज्ञापन क्यनीमखु ।

फेसबुक व इन्स्टाग्रामया सःशुल्क संस्करणया नितिं गुलि शुल्क पुलेमाःगु धैगु विषयस आःतक खुलस्त याःगु मदुनि ।

मेटां नं युरोपय् सःशुल्क सेवा सुरुआत यायेगु समाचारया विषयस छुं आधिकारिक धापू सार्वजनिक याःगु मदुनि ।

Categorized in अन्तर्राष्ट्रिय