Mohanai 2078 KTM

आः उद्योगमन्त्री जुइम्ह सु ? उमेश श्रेष्ठ कि सुजाता कोइराला

नेवा: अनलाइन न्युज – ललेन्द्र शाक्य | २०७८ आश्विन २४, आइतबार १३:२९:३६

गजेन्द्रबहादुर हमालं उद्योग, वाणिज्य व आपूर्तिमन्त्रीपाखें राजीनामा बिइधुंकाः आः उगु मन्त्रालयया नेतृत्वय् सु वइ ? धैगु चर्चा परिचर्चा न्ह्याःगु दु । हमालं थौं आइतवाः जक पदपाखें राजीनामा ब्यूगु खः । प्रधानमन्त्री शेरबहादुर देउवां हमालया राजीनामा स्वीकृत यायेधुंकूगु दु ।

प्रधानमन्त्रीलिक्क लाःगु उच्च स्रोतया कथं प्रधानमन्त्री देउवां उद्योग मन्त्रालयस आः प्रधानमन्त्री व मन्त्रिपरिषदया ज्याकुथिइ राज्यमन्त्रीया रुपं दुम्ह उमेश श्रेष्ठयात छ्वयेगु तयारी याःगु दु । लिपांगु ई रामचन्द्र पौडेलया पुचलं मन्त्री दयेकेगु धकाः चर्चा वःम्ह तर मन्त्री जुइमखंम्ह नेतृ सुजाता कोइराला नं मन्त्री जुइगु सम्भावना दूगु स्रोतया दाबी दु ।

सुजातां पौडेल व शशांक कोइरालया गुट त्वःतूगु घोषणा यायेधुंकूगु दु । अयसां वं थः सभापति देउवाया पक्षय् च्वनागु धकाः सार्वजनिक रुपं धायेधुंकूगु मदुनि । तर, झिंप्यक्वःगु महाधिवेशनयात लक्षित यानाः देउवां सुजातालिसे समीकरण यायेफूगु अनुमान धाःसा जूगु दु ।

उखे, थ्वसिबें न्ह्यः स्वास्थ्य मन्त्रालयस च्वनाः उमेश श्रेष्ठं बांलाःगु ज्या याःगु धकाः कांग्रेसया हे सुं सुं नेतापिन्सं धाःसा श्रेष्ठयात उद्योगमन्त्री दयेकेमाःगुलि लबिङ यानाच्वंगु दु ।

प्रधामन्त्री देउवां सुयात मन्त्री दयेकी ? व स्वये ल्यं दनि । तर, देउवां सुजाता व उमेशमध्ये छम्हेसित मन्त्री दयेकेफूगु कांग्रेस लिक्क लाःगु स्रोतया दाबी दु ।

Categorized in राजनीति