zero media family planning adv

आःया कोरोनां सकल छेँजःयात झ्याप्प याइगु जुयाच्वन : ख्यालिजुजु श्रेष्ठ (भिडियो)

नेवा: अनलाइन न्युज – ललेन्द्र शाक्य | २०७८ बैशाख १८, शनिबार ०८:५५:३८

ललेन्द्र शाक्य

मेडिसिटी अस्पतालय् च्यान्हु च्वनाः डिस्चार्ज जुल मदनकृष्ण श्रेष्ठ

ख्यालिजुजु मदनकृष्ण श्रेष्ठ च्यान्हु (८ दिं) यलया भैंसेपातिइ च्वंगु मेडिसिटी अस्पतालय् कोरोना कोभिड १९ भाइरस संक्रमणया वासः यानाः लंकाः म्हिगः शुक्रवाः अस्पतालं डिस्चार्ज जुयादीगु दु । आः ख्यालिजुजु श्रेष्ठ अस्पतालं डिस्चार्ज जुइधुंकाः थःगु हे छेँ यलया सुनागुथिइ आराम यानाः च्वनादीगु दु ।

अस्पतालं डिस्चार्ज जुयाः छेँय् लिहाँ वयेधुंकाः ख्यालिजुजु श्रेष्ठं छगू भिडियो थःगु फेसबुक पेजय् पोष्ट यानाः थः अस्पतालं डिस्चार्ज जूगु जानकारी बियादीगु खः । 

भाजु श्रेष्ठं सामाजि संजालय् सार्वजनिक यानादीगु भिडियोय् धयादीगु दु, ‘थः च्यान्हु मेडिसिटी अस्पतालय् वासः याकाः डिस्चार्ज जुयाः छेँय् लिहाँ वया । लसता नं पिज्वल कि मेडिसिटी अस्पतालं बांलाःगु सेवा बिया वासः उपचार यात । तर थ्व ई धैगु दुःखया ई खः । महासंकट प्रलय जुल कोरोना कहर । थ्व इलय् सकलसिन सकलसित माया यायेनु । सकलसिनं सकलसिगु बांलाःगु सोचे यायेनु । सकलसिनं सकलसिगु हित सोचे यायेनु । छुं मदु जिन्दगी, म्हगः (शरीर) भ्रमथें जक च्वं । पहाड तज्याःगुथें जक च्वं, फुक्क फय् जकथें च्वं, छुं मदु । उकिं बिन्ती, थ्व इलय् सुनानं सुंयात राजनीतिक इखविष तयाः थःगु नुगःयात फोहोर यायेमते । फुक्कसिनं फुक्कसिगु बांलाःगु भलो तायेकी । छम्हेस्यां मेम्हेसिगु वैमनस्यता भाव प्वंकाः सुयात नं हित मजुइगु जुयाच्वन । राक्षसपन ब्वलंकेगु जक खः नुगलय् । नुगलय् राक्षस मखु भगवान ब्वलंकेमाः । थ्व झी सकलसिनं स्यूगु हे खँ खः । थ्व जिं थःगु नुगलय् ब्वलंगु खँ सकलसित थुइके जक बियागु खः ।’

ख्यालिजुजु मदनकृष्ण श्रेष्ठ अस्पतालं डिस्चार्ज जूसां नं बल्लाःगु मदुनि । न्वःवायेत हे थाकुयाच्वंगु दु । वय्कलं सार्वजनिक यानादीगु भिडियोय् धयादी, ‘थ्व कोरोनां यानाः अतिकं कमजोर यात म्हगःयात, अतिकं यात, जिन्दगीइ गुबलें भोगे मयानागु भोगे याकल । न्हापाया कोरोनां इमिन्युटी पावर जिरो, व इनर्जी पावर दूगु अनुभव याना । आः जूगु कोरोना जिं ठ्याक्क अःखः जूगु अनुभव याना । छाय् धाःसा आःया कोरोनां इनर्जी पावर जिरो यात, इमिन्युटी पावर छुं मजूथें महसुस जुल, म्हगः दुने शक्ति हे मदु । प्लेटया नसाज्वलं नयेत चम्चा तकं ल्हाःतं ज्वनेमफूगु स्थिति ।’

ख्यालिजुजु मदनकृष्ण श्रेष्ठयात जक मखु, छेँजःया न्याम्हं दुजःपिं काय् यमनलिसें भौ, म्ह्याय् सराना व छय् तकं कोरोना संक्रमित जूगु खः । थः सकल छेँजः हे थ्व इलय् कोरोना संक्रमित जूगु खँ न्ह्यथंसें सार्वजनिक यानादीगु भिडियोय् ख्यालिजुजु श्रेष्ठं धयादी, ‘जिगु न्याम्हं हे छेँजःयात कोरोना जुल । न्हापाया कोरोनां छम्ह छम्हेसित जक ज्वनीगु जुयाच्वन, आःया कोरोनां ला सकल छेँजःयात झ्याप्प याइगु जुयाच्वन । सुनां सुयात वास्ता यायेगु स्थिति मन्त, सुनां सुयात क्वाःलः दायेकाः त्वंकेगु स्थिति मन्त, सुनां नसाज्वलं ज्वरे यायेगु, व अवस्था नं मन्त । जि च्यान्हु अस्पताल च्वनावया । नुगः नुगः दुने भगवान दुपिं जलाखलापिं दयाः जिं थःत अतिकं भाग्यमानी तायेकाः । जलाखला दाजुकिजा तःकेहेँपिन्सं जिगु छेँजःयात साःसाःगु नकेत्वंके यानाः ग्वाहालि यात । सकलसित दुनुगलंनिसें कृतज्ञता प्वंकाच्वना । थथे हे जुइमाः, देय् न्यंकं थुज्वःपिं जलाखलाथें जाःपिं दयेमाः, छम्हेस्यां मेम्हेसित माया याइपिं, छम्हेस्यां मेम्हेसित मतिनाया मिखां स्वइपिं । थथे जूसा संसार सुख जुइ, संसारयात सुख यायेनु ।’

ख्यालिजुजु मदनकृष्ण श्रेष्ठं सार्वजनिक यानादीगु भिडियो दकलें लिपा थथे धयादीगु दु, ‘संसारया दुर्दशा जुयाच्वंगु दु, फुक्क छप्पं जुयाः कोरोनायात त्याकेमाःगु दु । मास्क अतिकं जरुरी जू, मास्कयात गुबलें त्वःतेमते । असुरक्षित थासय् वनेबलय् मास्क तयादिसँ । सामाजिक भौतिक दूरी कायम यानादिसँ, साबुं लखः ल्हाः सिलादिसँ । फुक्कसिगु जय जुइमाः ।’ 

(थन क्लीक यानाः ख्यालिजुजुया नुगःखँ न्यनादिसँ)

Categorized in नेवाः