kmc bidya

आःतक २ लख ८३ हजार मनूत सित : रुस व इक्वेडरय् स्थिति भयावह !

नेवा: अनलाइन न्युज | २०७७ बैशाख २९, सोमबार ०८:१०:१०

कोरोना भाइरसया हुनि. सीपिनिगु ल्याः २ लख ८२ हजार ७ सय् पुलेधुंकूगु दु ।

कोरोनां दकले अप्वः अमेरिकाया नागरिकपिनिगु ज्यान व.गु दुसा संक्रमण नं अमेरिकाय् हे आपालं ब्वलंगु दु ।

अमेरिकाय् कोरोना भाइरस संक्रमणपाखें सीपिनगु ल्याः थौंतकया दुने रिपोर्ट कथं ८० हजार ३ सय ६१ म्ह थ्यंगु दु । अथेहे अन भाइरसपाखें संक्रमित जूपिनिगु ल्याः १३ लख ५४ हजार थ्यंगु दु । आइतवाः अमेरिकाय् ३२४ म्ह सीगु दुस । न्हापांगु दिंया सिबे. म्हो मनूत सीगु धाःगु दु । न्हापांगु दिं ७२० म्ह मनूत सीगु खः ।

उखे, बेलायतय् सीपिनिगु ल्याः ३१ ह्जार ८ सय ५५ म्ह थ्यंगु दु । संक्रमितया ल्याः २ लख १९ हजार पुलेधुंकुगु दु । बेलायतय् कोरोना भाइरसया लिच्वः अप्वः हे लानाच्वंगु खनेदु । अन सुरुवाती चरणय् नियन्त्रणय् हे दुसां नं लिपांगु इलय् उकिया लिच्वः तीव्र रुपं खनेदूगु खः । तर लिपांगु २४ घौ दुने २६८ म्ह जक मनुत सीगु दु ।

कोरोनाया उद्गमस्थल चीनय् ८२ हजार ९ सय १ म्ह संक्रमित जूगु दु । तर अन ७८ हजरा १ सय ४६ म्ह वासः यायेधुंकाः लनेधुंकूगु दु । चीनया वुहानं सुरु जूगु थ्व महामारीया लिच्वः लिपांगु इलय् युरोपय् अप्वः खनेदूगु खः ।

इटालीइ नं सीपिनिगु ल्याः न्हापांगु दिंया तुलनाय् छुं म्हो जूगु दु । शनिवाः इटालीइ १९४ म्ह मनूत सीगु खःसा आइतवाः १६५ म्ह सीगु खः । अन मुक्कं ३० हजार ५ सय ६० म्ह मनूत सीधुंकूगु दु ।

स्पेनय् न्हापांगु दिं १७९ म्ह मनूत सीगु खःसा आइतवा १४३ म्ह मनूत सीगु दु । थ्वलिसें स्पेनय् २६ हजार ६ सय २१ म्ह मनूत सीधुंकूगु दु ।

फ्रान्सय् नं आइतवाः ७० म्ह मनूत जक सीगु खःसा आः मुक्कं सीपिनिगु ल्याः २६ हजार ३ सय ८० म्ह थ्यंगु दु । फ्रान्सय् १ लख ७६ हजार ६ सयम्ह मनूत संक्रमित जूगु दु ।

अथेहे, भारतय् नं सीपिनिगु ल्याः २ हजार २ सय १२ म्ह थ्यंगु दु । अन लिपांगु २४ घौ दुने १११ म्ह मनूत सीगु दु । भारतय् संक्रमितपिनिगु ल्याः ६७ हजार १ सय पुलेधुंकूगु दु ।

ब्राजिलय् १० हजार ७ सय ३९ म्ह सीधुंकूगु दुसा १ लख ५७ हजार संक्रमित जूगु दु । बेल्जियमय् नं सीपिनिगु ल्याः ह्वात्त हे अप्वःगु दु । अन ८ हजार ६ सय ५६ म्ह मनूत सीधुंकूगु दु । अथेहे, जर्मनीइ १ लख ७२ हजार संक्रमित जूगु दुसा ७ हजार ५ सयम्ह सिबें अप्वः मनूत सीधुंकूगु दु ।

इरानय् १ लख ७ हजार ६ सयम्ह संक्रमित जूगु दु । लिसें ६ हजार ६ सय ४० म्ह मनूत सीधुंकूगु दु ।

रुसय् नं २ लख १० हजारम्ह मनूत संक्रमित जुइधुंकूगु दुसा १ हजार ९ सय १५ म्ह मनूत सीधुंकूगु दु । लिपांगु २४ घौ दुने रुसय् दकले अप्वः ११ हजारसिबें अप्वः मनूत संक्रमित जूपिं थप जूगु दु ।

कोरोनापाखें दकले अप्वः लिच्वः लाःगु देसत :

  • नेदरल्याण्ड – ५४४०
  • टर्की – ३७८६
  • क्यानडा – ४८७०
  • स्विडेन – ३२२५
  • स्विजरल्याण्ड – १८३०
  • मेक्सिको – ३३५३
  • इक्वेडर – २१२७ (लिपांगु २४ घौ दुने इक्वेडरय् दकले अप्वः मनूत ४१० म्ह सित)
  • आयरल्याण्ड – १४५८
  • पेरु – १८४१
  • पोर्चुगल – ११३५
  • चीन – ४६३३

 

चीनया बुहान सहरय न्हापांगुखुसि खनेदूगु कोरोना आः हलिंन्यंकंया २१२ गू देसय् ब्वलनेधुंकूगु दु । आःतक थ्व भाइरसया हुनिं ४१ ल्ख ५३ हजार मनूत संक्रमित जूगु दु ।

संक्रमितमध्ये थ्यंमथ्यं १४ लख ६६ हजारम्ह मनूत उपचार लिपा लनेधुंकूगु दु । उपचार यानाच्वंपिं थ्यंमथ्यं २४ लख ५ हजारमध्ये ४७ हजार ३ सय ५७ म्ह मनूतय्गु अवस्था धाःसा चिन्ताजनक जुयाच्वंगु दु ।

Categorized in अन्तर्राष्ट्रिय