zero media family planning adv

असोज ५ निसें खुल्ला सार्वजनिकक यातायात

नेवा: अनलाइन न्युज – ललेन्द्र शाक्य | २०७७ भाद्र ३०, मंगलबार ११:१०:३२

सरकारं स्वास्थ्य सुरक्षाया मापदण्डलिसें सार्वजनिक व आन्तरिक हवाई यातायात असोज ५ गतेनिसें खुल्ला यायेगु निर्णय याःगु दु । भूमि व्यवस्था, सहकारी व गरिबी निवारण मन्त्री पद्माकुमारी अर्यालया कथं सोमवाः च्वंगु मन्त्रिपरिषद बैठकं स्वास्थ्य मापदण्डया पूर्ण पालनालिसें सार्वजनिक व आन्तरिक हवाई यातायात खुल्ला यायेगु निर्णय याःगु खः । 

भौतिक पूर्वाधार व यातायात मन्त्रालयं ताःहाकःगु व मध्यम दूरीया सार्वजनिक यातायात असोज ५ गतेनिसें खुल्ला यायेगु प्रस्ताव कोभिड १९ संकट व्यवस्थापन केन्द्र (सीसीएमसी) इ छ्वःगु  खः । सीसीएमसीं उगु प्रस्तावया आधारय् निर्णयया नितिं मन्त्रिपरिषद बैठकय् पेस याःगु खः ।

सरकारया थ्वसिबें न्ह्यःया निर्णयपाखें असोज १ गतेतक ताःहाकःगु दूरीया सार्वजनिक सवारी संचालनय् रोक तःगु खः । असोज १ गतेनिसें हे संचालन यायेबलय् व्यवस्थापनय् थाकुइगुलिं असोज ५ गतेनिसें यातायात संचालन यायेगु कथं प्रस्ताव छ्वःगु मन्त्रालयं जानकारी ब्यूगु दु ।

यातायात ब्यवस्था विभागं नं सुरक्षाया उपाय छ्यलाः ताःहाकःगु दूरीया यातायात संचालन यायेत भौतिक पूर्वाधार व यातायात मन्त्रालययात सुझाब ब्यूगु दु । सरकारं क्वःछ्यूगु सुरक्षाया मापदण्ड छ्यलाः यातायात संचालन यायेफइगु विभागया महानिर्देशक गोगनबहादुर हमालं जानकारी ब्यूगु दु ।

यातायात व्यवसायीं ताःहाकःगु व मध्यम दूरीया सार्वजनिक यातायात खुला यायेत माग यानाः वयाच्वंगु खः । नेपाल यातायात व्यवसायी राष्ट्रिय महासंघया बरिष्ठ उपाध्यक्ष विजय स्वाँरं यातायात चायेकेगुया विकल्प मदूगु व सुरक्ष छ्यलाः यातायात संचालन यायेत व्यवसायी तयारी अवस्थाय् दूगु धाःगु दु ।

सरकारं कोरोना परीक्षणया शुल्क क्वपालाः निद्वः तका यायेधुंकाः सार्वजनिक यातायात संचालनय् अझ सहज जूगु महासंघया दाबी दु । यात्रा यायेन्ह्यः यात्रुं निद्वः तकाय् कोरोना परीक्षण यानाः पीसीआरया रिपोर्ट स्वया गाडीइ च्वनेदइगु व्यवस्था याःसां नं ज्यूगु व्यवसायीं धाःगु दु ।

अथे यायेबलय् गाडीइ सिट खाली तये नं म्वाःलीगु व भाडा नं दनीगु धाःगु दु । उपाध्यक्ष स्वाँरं धाःगु दु, “झ्याः चायेकाः चलेयायेगु खः प्लेनथें मखु, अले नीजि गाडीं १५–२० हजार कयाः यात्रु ठगेयाःगु दु, सेनिटाइजर, मास्कया व्यवस्था जिमिसं याये, सुरक्षा छ्यलाः चलेयायेगु खः ।”

यातायात संचालनया नितिं राजनीतिक दलया नेता व मन्त्रालयस व्यवसायीं दबाब बियाः वयाच्वंगु दु । वंगु चैत्र ११ गतेनिसें ताःहाकःगु व मध्यम दूरीया सार्वजनिक यातायात संचालन बन्द जूगु खः ।

(थौं पिदंगु गोरखापत्र न्हिपौपाखें)

 

Categorized in पत्रपत्रिका