नेवा: अनलाइन न्युज – ललेन्द्र शाक्य | २०७८ माघ ९, आइतबार १६:३८:२८

येँया २७ वडा असं नासःननी त्वालय् बालं च्वनाच्वंम्ह विजय चौधरी स्यानातःगु अवस्थाय् लूगु दु ।

म्हिगः शनिवाः नवलपरासी रामग्राम नगरपालिका वडा ल्याः ९ पिपरहिया व जोकवारी सतकखण्डय् थथे स्यानाः वांछ्वयातःगु अवस्थाय् चौधरीया सीम्ह लूगु खः ।

अपराधीपिन्सं ल्हाःतय् चिनाः म्हुतुइ कापतं त्वःपुयाः स्यायेधुंकाः वांछ्वयातःगु अवस्थाय् लूगु खँ प्रहरीं धाःगु दु ।

थ्यंमथ्यं ४० दँ जक दुम्ह चौधरी थः छेँजःलिसें असं न्हायकंत्वाः, बालकुमारी व असंया नासःननीइ छेँया नितिं माःगु थीथी हलंज्वलं हार्डवेयरया सामानया पसः दुम्ह खः ।

तःदँ न्ह्यःनिसें चौधरी थःपिनिगु दां छगू इन्भेष्टमेन्ट कम्पनीं थगेयानाः नल धकाः उगु दां कायेगु नितिं ब्वाँय् जुयाच्वंम्ह खः । प्रहरीं थुगु हत्याया घटनाया ल्यूने प्रारम्भिक चरणय् आर्थिक कारोवारया विषय स्वानाच्वंगु अनुमान याःगु दु ।

चौधरीया अबु तुलसी चौधरीं थः काय्या हत्या जूगु व सनाखत यायेधुनागु खँ नेवाः अनलाइनन्यूजयात कंगु दु । अथेहे, वय्कलं थःपिं आः नवलपरासीइ दूगु प्रहरीं पोष्टमार्टम लिपा जक सीम्ह बिइगु खँ धाःगुलिं अन्तिम संस्कार मजुनिगु खँया जानकारी ब्यूगु दु ।

मदुम्ह चौधरी असं त्वालय् अप्वःसिनं म्हस्यूम्ह व्यक्ति खःसा थ्यंमथ्यं प्यदँ न्ह्यः मदुम्ह चौधरीया काय् अपहरणय् लाःगु खः । अपहरणकारीपिनिगु पाखें प्रहरी व सकसिगु ग्वाहालिं थः मचा मुक्त यायेत ताःलाःगु खः ।

मदुम्ह चौधरीया असनय् मां, अबु, कका व जहान बालं कयाः च्वनाच्वंगु खः ।

Categorized in दुर्घटना-अपराध