prabhu baink new

अल्का अस्पतालया कर्मचारीया हत्या : लेलेया जंगलय् सीम्ह लुल

नेवा: अनलाइन न्युज – ललेन्द्र शाक्य | २०७७ भाद्र २०, शनिबार १४:२३:००

यलया पूच्वय् च्वंगु अल्का अस्पतालया कर्मचारी ३९ दँया गीता केसीया हत्या जूगु दु । केसीया सीम्ह गोदावरी नगरपालिका १० मुलडोलय् च्वंगु लेलेया जंगलय् लुइकूगु दु ।

हत्याय् दुथ्याःगु आशंकाय् केसीया छेँ दूगु थाय् भैंसीपाटी क्षेत्रपाखें काय्चा निर्मल केसीयात गिरफ्तार याःगु दु । वयात आः यल प्रहरी परिसर, ज्यावलाख्यःया हिरासतय् तयाः अनुसन्धान न्ह्याकूगु दु ।

प्रारम्भिक अनुसन्धानय् गीता केसीया ककु तियाः हत्या याःगु जुइफूगु सीदूगु दु । केसीया छेँजःपिन्सं व तंगु धकाः स्वन्हु न्ह्यःनिसें महानगरीय प्रहरी परिसर यलय् उजुरी ब्यूगु दु ।

प्रहरीं खोजतलास यानाच्वंगु हे इलय् शुक्रवाः सनिलय् मू सतकं २०० मिटर दुने लेलेया जंगलय् गीता केसीया सीम्ह लुयावःगु खः ।

थौं शनिवाः सुथय् उगु सीम्ह केसीया जूगु पुष्टि जूगु महानगरीय प्रहरी वृत्त वादे (चापागां)या डिएसपी कृष्णराज ओझां नं जानकारी ब्यूगु दु ।

आः सीम्हयात पोष्टमार्टमया नितिं पाटन अस्पताल यंकूगु दु । गीता केसीया म्हगलय् मेमेगु घाःपाः खनेमदु । अय्सां पोष्टमार्टम लिपा विस्तृत जानकारी वइ धकाः प्रहरीं धाःगु दु ।

यल प्रहरीया डिएसपी सन्तोष तामांगया कथं हत्याया हुनि बारे अनुसन्धान जुयाच्वंगु दु । वं धाःगु दु, ज्यान सम्बन्धी कसुरय् म्याद थप यानाः विस्तृत अनुसन्धान यायेगु जुइ ।

Categorized in दुर्घटना-अपराध