prabhu baink new

अर्थमन्त्री डा. खतिवडा सरकारपाखे बाई...बाई... जुइगु पक्का

नेवा: अनलाइन न्युज – ललेन्द्र शाक्य | २०७७ भाद्र ७, आइतबार ११:१९:३०

राजनीतिक पृष्ठमूमिया पूर्व गभर्नर डा. युवराज खतिवडा निदँत्याः मन्त्री जुयाः सरकारपाखें बिदा जुइगु निश्चित जूगु दु ।

डा. खतिवडा सांसद मजूगुलिं भाद्रया स्वंगूगु वाःपाखें स्वतः पद त्याग याइ । सरकारया सिफारिसय् राष्ट्रपति विद्यादेवी भण्डारीं छम्ह राष्ट्रियसभा दुजः मनोनित याये ल्यंदनिसां नं डा. खतिवडां मौका कायेमखनीगु सीदूगु दु ।

अर्थ व संचार लिसें सूचना प्रविधिया तकं भाला कुबियाच्वंम्ह डा. खतिवडां थःलिसे निकटस्थयात आः थः विदा जुइत्यनागु शुक्रवाः जानकारी याकूगु विश्वस्त स्रोतं धाःगु दु । वं थः विदा जुयाः वनेत्यंगु इलय् थः मनूतय्गु व्यवस्थापन तकं यायेगु ज्या न्ह्याकाच्वंगु सीदूगु दु ।

डा. खतिवडाया धापू उदृत यासें विश्वस्त स्रोतं धाःगु दु, आः जि विदा जुइगु ई वयाच्वंगु दु । वं नेकपा दुनेया विवाद मिलेयायेगु झ्वलय् मेपिं सुं राष्ट्रियसभाय् मनोनित जुइगु तकं धाःगु स्रोतं जानकारी ब्यूगु दु ।

नेकपा दुने मन्त्रिमण्डल पुर्नगठनया तयार जुयाच्वंगु इलय् राष्ट्रियसभाय् वामदेव गौतमया मनोनयन जुइगु सम्भावना अप्वःगु दु । गौतमयात राष्ट्रियसभाय् हयेत प्रधानमन्त्री केपी शर्मा ओलीं तकं प्रस्ताव यायेधुंकूगु दु ।

पूर्व गभर्नर डा. खतिवडालिसे प्रशासनिक क्षेत्रया ताःहाकःगु अनुभव दुसां नं राजनीतिक अनुभव धाःसा पटक्क हे मदु । वयाके राजनीतिक अनुभव मदुगुलिं नं नेकपा दुने डा. खतिवडाप्रति असन्तुष्टि व्याप्त जुयाच्वंगु खः ।

Categorized in राजनीति