city axpris 2

अरुण चौधरीयात निन्हुसिबें अप्वः थुनाय् मतयेत आदेश ब्यूम्ह न्यायाधीश मुगु सरुवा

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व तृतीया

जिल्ला अदालत येँया न्यायाधीश यज्ञप्रसाद आचार्यया मुगुइ काज सरुवा याःगु दु ।

बाँसबारी जग्गा प्रकरणय् अनुसन्धानया नितिं गिरफ्तारीइ लाःम्ह अरुण चौधरीलिसें स्वम्हेसित निन्हुसिबें अप्वः हिरासतय् मतयेत ओश ब्यूम्ह न्यायाधीश आचार्ययात मुगुइ काज सरुवा याःगु खः । वया थासय् न्यायाधीश रमाकान्त अधिकारीयात हःगु दु ।

प्रधानन्यायाधीश विश्वम्भरप्रसाद श्रेष्ठं जिल्ला अदालत येँपाखें ब्यूगु आदेशउपर गम्भीर कैफियत प्वंकूसें उकी दुथ्याःम्ह न्यायाधीशयात सजायस्वरुप दुर्गम मुगुइ काज सरुवा याःगु खः ।

प्रहरीं हिरासतय् तयेत अनुमति काःगु प्यन्हुया म्याद क्वचायेधुंकाः गिरफ्तारीइ लाःम्ह चौधरी, तत्कालीन बाँसबारी छाला जुत्ता कारखानाया कार्यकारी नायः अजितनारायण सिंह व संजय ठाकुरयात वंगु माघ २२ गते जिल्ला अदालत येँय् पेश याःगु खः । जिल्ला न्यायाधीश आचार्यया इजलासं इमित आः निन्हुसिबें अप्वः हिरासतय् तयेमते धकाः दिं हे क्वःछ्यूगु खः ।

न्यायाधीश आचार्यं गिरफ्तारीइ लाःपिन्सं थः उपर लाःगु द्वपनय् अनुसन्धानय् ग्वाहालि यायेगु प्रतिबद्धता प्वंकूगु, विवादित सम्पत्ति सुनानं मासेयायेगु सुचुकेगु वा आः हे मेथाय् हक हस्तान्तरण यानाः अनुसन्धान प्रभावित यायेफूगु अवस्था मदूगु धासें अनुसन्धानया नितिं प्रहरीं माग याःकथं २५ न्हुहे ई म्वाःगु धासें निन्हुसिबें अप्वः हिरासतय् मतयेगु निर्णय याःगु खः ।

Categorized in राजनीति