city axpris 2

अरुण चौधरीयात त्वःतेत आदेश ब्यूम्ह न्यायाधीश अपराधी व भ्रष्टाचारी खः – आक्रोश माओवादी सांसदया

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व तृतीया

नेकपा माओवादी केन्द्रया सांसद नरबहादुर विष्टं बाँसबारी जग्गा प्रकरणय् गिरफ्तारीइ लाःम्ह ब्यापारी अरुण चौधरीलिसें स्वम्हेसित त्वःतेत आदेश ब्यूम्ह न्यायाधीशयात अपराधी व भ्रष्टाचारीया संज्ञा ब्यूगु दु ।

सोमवाः च्वंगु राष्ट्रियसभाया मुँज्याय् न्वःवासें सांसद विष्टं येँ जिल्ला अदालतया न्यायाधीश यज्ञप्रसाद आचार्यं अरुण चौधरीयात निन्हुया दिं हे त्वःतेत आदेश ब्यूगु खः । सांसद विष्टं न्यायाधीश आचार्ययात भ्रष्टाचारी अपराधीया आक्षेप ब्यूगु खः ।

सांसद विष्टं धाःगु दु, ‘जिं थौं न्यूज न्यना कि, अरुण चौधरीयात निन्हुया दिं दुने त्वःतकूम्ह न्यायाधीश मुगुसरुवा जुल हँ, कारवाहीस्वरुप । मुगु धैगु नेपालय् हे खः । मुगु हे छाय् सरुवा यायेमाल । व अनैतिक खः, भ्रष्टाचारी खः । व अपराधीयात दण्ड बिइगु थासय् वयात न्याय परिषदं कारवाही यायेमाःगु खः । सरुवा यानाः ला अन नं अथेहे याइ वं । उकिं थ्व विडम्वनाया खँ खः ।’

बाँसबारी जग्गा प्रकरणय् गिरफ्तारीइ लाःपिं अरुण चौधरीलिसें स्वम्हं हे वंगु बुधवाः रिहा जूगु खः ।

माघ १८ गते गिरफ्तारीइ लाःपिं इमित हिरासतय् तयेत सुरुइ प्यन्हु दिं अदालतं म्याद ब्यूगु खःसा वधुंकाः न्यायाधीश आचार्यया इजलासं निन्हुया दुने हे त्वःतेत आदेश ब्यूगु खः । उगु आदेश विवादास्पद जूगु दु ।

आदेश विवादास्पद जुइधुंकाः प्रधानन्यायाधीश विश्वम्भरप्रसाद श्रेष्ठं वयात कारवाहीस्वरुप थौं सोमवाः मुगुइ काज सरुवा याःगु दु ।

Categorized in राजनीति