dudha jayanti 2568

अय्लाः लूवया पुचःया मेगु म्ये ‘माया मदुला... ?’ पिदन

नेवा: अनलाइन न्युज – विजयरत्न | ने.सं. ११४४ चिल्लाथ्व तृतीया (२०८० चैत्र २९ गते) बिहिवाः

नेपालभाषा संगीत ख्यलय् अतिकं बयबय् जुयाच्वंगु ‘अय्लाः लूवया’ म्ये पिथंगु पुचलं हाकनं मेगु न्हूगु नेपालभाषाया म्ये ‘माया मदुला...?’ पिथंगु दु ।

वंगु मंगलवाः बहनी पितब्वज्या जूगु थ्व म्ये थौं बिहिवाः आःतकया दुने ८८ द्वः स्वकुमिपिन्सं स्वयेधुंकुगु दु ।

‘अय्लाः लूवया’ म्येहालामिपिं रोजमान महर्जन व निशा देशारया सः दुथ्याना च्वंगु थुगु ‘माया मदुला...?’ म्येया म्यूजिक भिडियो पितब्वज्या वंगु मंगलवाः रस्टी गार्डेन रेष्टुरेन्टय् जुउगु खः।

उगु म्यूजिक भिडियो पितब्वज्या ज्याझ्वः यल महानगरपालिका वडा ल्याः २१ या वडानायः रविन्द्र महर्जनया मूपाहाँसुइ जूगु खः । ज्याझ्वलय् भिडियोस आवद्ध कलाकारपिंत सम्मान व दसिपौ नं लःल्हाःगु खः ।

उगु भिडियोस नेपालभाषा म्ये संकिपा ख्यःया लोकंह्वाःगु जोडी मनोज महर्जन व नेरिसा महर्जनया जोडी दु । युट्युू्बया ख्यलय् तसकं लोकंह्वाःम्ह आशुतोष बाराहीया निर्देशनय् युट्युबया हे लोकंह्वाःगु चरित्र थुगु हे पुचःया हिराकाजी, ल्याम्हकाजी, ल्यासेमैं व आशामान अर्थात जेनिस शाक्य, आशुतोष बाराही व नितेश तण्डुकारया पुचः लिसें इरा महर्जन व संजना महर्जन नं दु ।

थुगु म्यूजिक भिडियोयात ज्यासः प्रोडक्शन टिमं न्ह्यब्वःगु खः । म्येया कोरियोग्राफी इरा महर्जनं यानातःगु दु । भिडियोया छायाँकन न्हूजः शाक्य व अविन शाक्यं यानातःगु दुसा निर्देशन व सम्पादन आशुतोष बाराहीं हे यानातःगु दु ।

ज्याझ्वलय् कुमाः सागरं थःगु लोकंह्वाःगु थीथी म्ये हालाः न्यंकुगु खःसा गायक रोजमान महर्जन व नीशा देशारं ‘अय्ला लूवया’ म्ये न्यंकुगु खः ।

Categorized in कला