nepal investment baink

अयोध्या काण्ड : प्रधानमन्त्री ओलीया अभिव्यक्ति राजनीतिक विषयलिसे स्वाइमखु : परराष्ट्रया स्पष्टीकरण

नेवा: अनलाइन न्युज – ललेन्द्र शाक्य | २०७७ आषाढ ३०, मंगलबार १९:४५:४१

परराष्ट्र मन्त्रालयं अयोध्याबारे प्रधानमन्त्री केपी शर्मा ओलीया अभिव्यक्तिबारे स्पष्टीकरण ब्यूगु दु ।

मन्त्रालयं विज्ञप्ति सार्वजनिक यासें प्रधानमन्त्रीया अभिव्यक्ति राजनीतिक विषयलिसे मस्वाःगु धाःगु दु ।

विज्ञप्तिइ धयातःगु दु, प्रधानमन्त्रीया अभिव्यक्ति राजनीतिक विषयलसे स्वानाच्वंगु मदु व सुयागु भावनाय् चोट लाकेगु आशय मखु ।

ओलीं भगवान राम भारतीय मजूगु व असली अयोध्या वीरगञ्ज लिक्कच्वंगु ठोरीइ लाःगु दाबी याःगु खः ।

तर परराष्ट्रं धाःसा प्रधानमन्त्रीं श्रीराम व वलिसे सम्बद्ध थाय् बारे आपालं किंवदन्ती दूगु व न्हूगु तथ्यत कायेत रामायणं प्रतिनिधित्व याइगु गहन सांस्कृतिक भूगोलया थप अध्ययन, अनुसन्धानया महत्वयात बः जक ब्यूगु धाःगु दु ।

विज्ञप्तिइ प्रधानमन्त्रीया टिप्पणीं अयोध्याया महत्व व सांस्कृकित मूल्ययात अवमूल्यन यायेगु आज्जु तःगु मदु धकाः धयातःगु दु ।

लिसें विवाह पंचमीइ प्रत्येक दँ भारतया अयोध्यापाखें जनकपुरय् जन्ती वइगु व २०१८ य् निगू देसया प्रधानमन्त्रीं रामायण सर्किटया उलेज्या याःगु लुमंकूसें परराष्ट्र मन्त्रालयं धाःगु दु, थ्व तथ्यतसें निगू देस व जनतादथुया सांस्कृतिक समानतायात संकेत याइ ।

Categorized in राजनीति